Давлатимиз раҳбарининг фармони билан тадбиркорликни қўллаб-қувватлашнинг табақалаштирилган тизими жорий этилмоқда

Ўзбекистон Президенти «Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисида»ги Фармонни имзолади, деб хабар бермоқда «Дунё» АА

«Норма» ҳуқуқий портали маълумотига кўра, ушбу ҳужжатга мувофиқ, республиканинг барча туман (шаҳар)лари 5 та тоифага тақсимланди. Эндиликда солиқ имтиёзлари ва субсидиялар туман (шаҳар)нинг тоифасидан келиб чиқиб ажратилади.

2023 йилнинг 1 январидан 2026 йилнинг 1 январига қадар солиқ солишнинг қуйидаги табақалаштирилган тартиби жорий этилди:

 5-тоифадаги туманларда рўйхатдан ўтган ва шу ҳудудларда фаолият юритадиган тадбиркорлар (йирик солиқ тўловчилар, доимий муассаса, бюджет ташкилоти ва давлат корхонаси, устав жамғармаси (капитали)да давлат улуши 50 фоиз ва ундан кўпроқ миқдорда бўлган юридик шахслар бундан мустасно) қуйидагиларни тўлайдилар:

 фойда солиғи, айланмадан олинадиган солиқ ва ижтимоий солиқни 1 фоиз миқдорида;

 юридик шахсларнинг мол-мулкига солинадиган солиқ ва юридик шахслардан олинадиган ер солиғини мазкур солиқлар бўйича ҳисобланган сумманинг 1 фоизи миқдоридаги солиқ ставкалари бўйича тўлайди;

 5-тоифадаги туманларда рўйхатдан ўтган ва шу ҳудудларда фаолият юритадиган ЯТТлар (якка тартибдаги тадбиркор) жисмоний шахслардан олинадиган даромад солиғининг қатъий белгиланган суммаларини тўлашдан озод қилинади;

 4-тоифадаги туманларда рўйхатдан ўтган ва шу ҳудудларда фаолият юритадиган тадбиркорлик субъектлари (йирик солиқ тўловчилар, доимий муассаса, бюджет ташкилоти ва давлат корхонаси, устав жамғармаси (капитали)да давлат улуши 50 фоиз ва ундан кўпроқ миқдорда бўлган юридик шахслар бундан мустасно) учун айланмадан олинадиган солиқнинг базавий солиқ ставкаси 3 фоиз этиб белгиланмоқда.

 Жўқорги Кенгес ва халқ депутатлари вилоятлар Кенгашларига 4-тоифадаги туманлар бўйича:

 юридик шахсларнинг мол-мулкига солинадиган солиқ ва юридик шахслардан олинадиган ер солиғи бўйича Солиқ кодекси билан белгиланган энг кам қийматларга 0,3 гача;

 ЯТТ учун қатъий белгиланган миқдордаги жисмоний шахслардан олинадиган даромад солиғи бўйича 0,5 гача камайтирувчи коэффициент киритиш ҳуқуқи берилади.

Тадбиркорлик фаолиятини қўллаб-қувватлаш давлат жамғармаси томонидан 4 ва 5-тоифадаги туманларда рўйхатдан ўтган ва шу ҳудудларда фаолияти юритадиган кичик тадбиркорлик субъектларига тижорат банкларининг кредит ва лизинглари бўйича унинг асосий ставкадан ошган, бироқ Марказий банк асосий ставкасининг 40 фоиздан кўп бўлмаган қисмини қоплаш учун компенсация тақдим этилади. Банк кредитларининг 75 фоиз, бироқ умумий қиймати 2,5 миллиард сўмдан ошмаган миқдорда кафиллик тақдим этилади.

Қарор билан аҳоли ва тадбиркорлик субъектларига ажратиладиган субсидиянинг оширилган миқдорлари тасдиқланган.

Амал қилиш муддати белгиланмаган субсидиялар 2025 йил 1 январга қадар жорий этилган ҳисобланади.

Субсидия олиш учун сохта ҳужжатлар тақдим этилганда, тақдим этилган субсидиялардан мақсадсиз фойдаланилганда ва уларни қўллаш шартларига риоя этилмаганда субсидиялар пеня билан қайтариб олинади.

4 ва 5 тоифалар учун тадбиркорлик соҳасида лицензия ва рухсатномалар олиш учун давлат божи икки бараварга пасайтирилди.
«Дунё» АА