EKSPORT HAJMI OSHMOQDA

Buxorodagi “Buxoro brilliant silk” O‘zbekiston – Xitoy qo‘shma korxonasida pillani qayta ishlab, mato tayyorlash yo‘lga qo‘yildi.

Ushbu loyihani amalga oshirish uchun 2 million dollardan ziyod mablag‘ sarflandi. Zamonaviy texnologik uskunalar bilan jihozlangan yangi sexda ipak tolasidan turli o‘lchamdagi matolar to‘qilayotir.

– Avtomatlashtirilgan to‘quv dastgohlarining ish unumi yuqori, – deydi korxona to‘quvchisi G.G‘ulomova. – Ularni boshqarish malaka va ko‘nikma talab etadi. Gulshoda Mirzayeva, Gulshan Nabiyeva singari kasbdoshlarim bilan zamonaviy dastgohlarni boshqarishni o‘zlashtirib, tajribamizni yoshlarga o‘rgatmoqdamiz.

To‘qilayotgan matolar zamonaviy printerli gul bosish dastgohida kamalakrang atlas va adras tusini oladi. Dastgoh dastur asosida matoga istalgan ko‘rinish va tusdagi ranglarni tushirish imkoniyatiga ega. Bunda buyurtmachi taklifi va bozor talabi asosida ish tutiladi. Hozir bu yerda “Bahor”, “Yomg‘ir”, “Yulduzlar” kabi o‘nlab ko‘rinishdagi matolar ishlab chiqarilmoqda. Printerda bosiladigan gullarning o‘ziga xosligi shundaki, ular rangi uniqmaydi, suv va quyosh nuriga chidamli.

Ipak matolar ekologik toza, har qanday iqlimga mos. Bu matolar hozircha ichki bozorga, buyurtma asosida Farg‘ona, Samarqand, Xorazm viloyatlari va Toshkent shahridagi xaridorlarga yetkazib berilmoqda. Ayni paytda yangi mahsulotni eksport qilish bo‘yicha xorijiy hamkorlar bilan muzokaralar olib borilayotir.

“Buxoro brilliant silk” qo‘shma korxonasining ipak tolalari xorijda xaridorgir. O‘tgan yili korxona Eron, Vetnam, Turkiya, Hindiston mamlakatlariga 2 million dollarlik mahsulot eksport qilgan. Joriy yilning o‘tgan davrida qariyb 1,8 million dollarlik mahsulot xorij bozoriga chiqarildi. Yil oxiriga qadar bu ko‘rsatkichni 2,5 million dollarga yetkazish rejalashtirilgan.

O’zA