Inson huquq va erkinliklari himoyasi yo‘lida

O‘zbekiston Respublikasi Adliya vazirligi tomonidan Advokatlar palatasi bilan hamkorlikda “Advokatura instituti – inson huquq va erkinliklari himoyasi yo‘lida” mavzusida matbuot anjumani o‘tkazildi.

O‘zbekiston Respublikasi Advokatlar palatasi raisi R.Ahmedov va boshqalar inson huquqlarini ta’minlashda fuqarolarning malakali huquqiy yordam olishga bo‘lgan konstitutsiyaviy huquqini ro‘yobga chiqarish muhim ahamiyatga ega ekanini ta’kidladi. Advokatura institutining takomillashtirilgani shu maqsadga xizmat qilayotir.

Davlatimiz rahbarining 2008-yil 1-maydagi “O‘zbekiston Respublikasida advokatura institutini yanada isloh qilish chora-tadbirlari to‘g‘risida”gi farmoni sud-huquq tizimini liberallashtirish, fuqarolarning tergov va sud ishini yuritishning har qanday bosqichida malakali yuridik yordam olish huquqini mustahkamlaydigan konstitutsiyaviy qoidani amalga oshirish uchun keng yo‘l ochdi.

Mazkur hujjat advokaturaning tashkiliy mustaqilligini ta’minlash, uni yuqori malakali kadrlar bilan to‘ldirish, soha mutaxassislarining mustaqilligi kafolatlarini kuchaytirish, ushbu kasb obro‘si va nufuzini yanada oshirish, advokatura institutini isloh qilishda mohiyat jihatdan yangi bosqichni boshlab berdi. Chunki shu asosda uchta qonun, beshta hukumat qarori, to‘qqiz idoraviy normativ-huquqiy hujjat qabul qilindi. Ular asosida mamlakatimizda prokuror va advokatning tengligini, jinoyat va fuqarolik ishlari bo‘yicha sud faoliyatining barcha bosqichida o‘zaro tortishuv bo‘lishini ta’minlashga, odil sudlov sifati va tezkorligini oshirishga qaratilgan keng ko‘lamli chora-tadbirlar amalga oshirilmoqda. Jumladan, qonunchiligimizda nafaqat jinoiy javobgarlikka tortilayotgan yoki jabrlangan shaxsning, balki guvohning ham o‘z huquqlari va qonuniy manfaatlari advokat orqali himoya qilinishi mustahkamlab qo‘yildi. Bu, o‘z navbatida, inson huquq va erkinliklari kafolatlari yanada kuchayishga zamin yaratdi.

Sohaning tashkiliy asosini takomillashtirishga ham e’tibor qaratilib, Advokatlar palatasi tuzildi. Palata advokaturaning inson huquq va erkinliklarini himoya qilishdagi rolini kuchaytirish, aholining huquqiy bilim va madaniyatini oshirishga qaratilgan ma’rifiy targ‘ibot tadbirlarini o‘tkazib kelmoqda. Shuningdek, davlat va xo‘jalik boshqaruvi organlari bilan munosabatlarda, sudda ularning huquq va manfaatlarini ifodalash hamda himoya qilish, aholining yuridik yordamdan foydalana olish imkoniyatini tumanlar va shaharlarda yuridik maslahatxonalar tashkil etish orqali ta’minlash, advokatlar tomonidan qonun hujjatlariga, kasb etikasi qoidalariga rioya etilishi ustidan nazoratni amalga oshirayotir.

Tadbirda bugungi kunda mamlakatimizda 1,3 mingdan ziyod advokatlik tuzilmasi faoliyat yuritayotgani, ularda jami 3,7 mingdan ortiq mutaxassis fuqarolarga yuridik yordam ko‘rsatayotgani aytib o‘tildi.

Ommaviy axborot vositalari vakillarini advokat kasbiga qo‘yiladigan talablar, litsenziya berishning tartib-taomillari, soha mutaxassislari malakasini oshirish, qonunchilikda advokat xizmatidan foydalanishning huquqiy asoslari haqidagi savollar qiziqtirdi. Mutaxassislar anjumanda ko‘tarilgan barcha masalalar yuzasidan ma’lumot berdi.

www.uza.uz