Konrad Adenauer jamg’armasi delegatsiyasi O’zEOAVMAda

O’zbekiston elektron OAV milliy assotsiatsiyasi (O’zEOAVMA) “Bunyodkor” yoshlar telekompleksiga K.Adenauer fondi markaziy boshqaruvi a’zosi Dieter Althaus, Tyuringiya Xristian demokrat ittifoqi (XKI) raisi Evelin Gross, XKI ish boshqaruvchisi va K.Adenauer fondining hududiy vakolatxonasi boshlig’i Tomas Kunselar hamda tashkilotning boshqa vakillaridan iborat delegatsiya tashrif buyurdi, deya xabar beradi assotsiatysiya matbuot xizmati.

Mehmonlarda innovatsion imkoiyatlari poytaxt va hududlardagi tomoshabinlarni qamrab olish imkonini beruvchi Onlayn trening markazi katta qiziqish uyg’otdi. Trening markazida turli teledasturlar va tok-shoularini tasvirga olishdan tashqari, bu yerda O’zEOAVMAga a’zo nodavlat teleradiostansiyalar xodimlari uchun mahalliy va xalqaro trenerlar ishtirokida turli seminar treninglar, mahorat darslari va onlayn vebinarlar o’tkazilishi haqida ham ta’kidlandi.

Ta’kidlab o’tish joiz, bu yil Konrad Adenauer fondining Markaziy Osiyo bo’yicha vakolatxonasi va O’zbekiston elektron ommaviy axborot vositalari milliy assotsiatsiyasi o’rtasida ikki taraflama hamjihatlik memorandumi imzolanganiga 5 yil to’ladi.

O’tgan 5 yil davomida samarali hamkorlik natijasi o’laroq, 24 ga yaqin seminar treninglar, 4 ta mahorat darsi, 2 ta ixtisoslashtirilgan media oromgohlar, 4 ta davra suhbati, media forumlar va xalqaro konferensiyalar o’tkazildi. Ushbu tadbirlarda vazirliklar va idoralar, mahalliy va xalqaro tashkilotlar vakillari, yosh jurnalistlar va hududiy hamda poytaxt teleradiostansiyalarining xodimlari ishtirok etishdi.

“Jahon” AA