Малайзиянинг энг йирик сайёҳлик кўргазмасида Ўзбекистон туризм салоҳияти намойиш этилди

1-3 сентябрь кунлари Куала-Лумпур шаҳридаги Малайзия халқаро савдо ва кўргазмалар марказида (MITEC) ўтказилган «МАТТА Fair» энг йирик ва нуфузли сайёҳлик кўргазмасида Ўзбекистоннинг миллий павильони ташкил қилинди, деб хабар бермоқда «Дунё» АА мухбири.

Малайзия сайёҳлик компаниялари ассоциацияси (MATTA) 1975 йилда ташкил этилган бўлиб, 3 мингдан ортиқ сайёҳлик компанияларини бирлаштиради. МАТТА бутун мамлакат бўйлаб ўз ваколатхоналарига эга ва мунтазам равишда Малайзиянинг барча штатларида «МАТТА Fair» сайёҳлик кўргазмаларини ўтказади.

Куала-Лумпур шаҳридаги кўргазма Осиё-Тинч океани минтақасида энг йирик ва машҳур «B2C» (business-to-consumer) шаклидаги кўргазма ҳисобланади. Кўргазмада 1300 дан ортиқ сайёҳлик компаниялари иштирок этади, 200 мингга яқин меҳмон ташриф буюради.

Кўргазмада мамлакатимиз элчихонаси кўмагида Ўзбекистон Туризм қўмитасининг «Миллий PR-маркази» ДУК бошчилигидаги делегация иштирок этди. Миллий павильонда «East Asia Point», «Shahraz Travel», «Orient mice», «Euroasia Travels», «Another Travel» каби туркомпаниялар вакиллари томонидан сайёҳлик дастурлари «B2B» ва «B2C» форматларда фаол тарғиб қилинди.

Шунингдек, элчихона томонидан олиб борилган чора-тадбирлар натижасида Ўзбекистоннинг сайёҳлик дастурлари Малайзиянинг йирик туроператорлари павильонлари орқали истеъмолчилар орасида тарғиб қилинди.

Ўзбекистон миллий павильонида ва кўргазманинг катта саҳнасида мамлакатнинг туризм ва инвестициявий салоҳиятига бағишланган тақдимотлар ўтказилди. Тадбир иштирокчиларига республикамизда турли жабҳаларда олиб борилаётган кенг кўламли ислоҳотлар, туризм соҳасини жадал ривожлантириш ва зиёрат туризм салоҳиятини тарғиб қилиш бўйича амалга оширилаётган комплекс чора-тадбирлар ҳақида атрофлича маълумот берилди.

Хусусан, сўнгги йилларда виза режими соддалаштирилиши натижасида 93 та хорижий мамлакат, жумладан Малайзия фуқаролари учун республикамизга визасиз кириш тартиби амал қилаётгани алоҳида таъкидлаб ўтилди. Ўзбекистоннинг тарихий ва замонавий сайёҳлик маҳсулотлари, жумладан Самарқанд халқаро аэропорти ва «Silk Road Samarkand» халқаро туризм марказида сайёҳлар учун яратилган имкониятлар иштирокчиларга тақдим этилди.

Миллий павильонга ташриф буюрган Малайзия ва бутун Жануби-Шарқий Осиё минтақаси аҳолиси орасида зиёрат туризми, тарихий-маданий туризм, қишки туризм, гастрономик туризм каби сайёҳлик дастурлари ва ишбилармонлик туризми (MICE) имкониятлари катта қизиқиш уйғотди.

Кўргазма доирасида Малайзия сайёҳлик компаниялари ассоциацияси (MATTA) президенти Найжел Вонг билан музокаралар уюштирилди. Хориж томони Ўзбекистоннинг бой туризм салоҳиятига малайзияликлар орасида қизиқиш ортиб бораётганини ва сайёҳлик йўналишларини биргаликда тарғиб қилишга тайёрлигини билдирди.

Учрашув натижасида икки мамлакат туркомпаниялари ҳамкорлигида Ўзбекистонга қўшимча 2 минг нафар сайёҳни жалб қилиш, Малайзия туркомпаниялари учун республикага инфо-тур ташкил қилиш, Ўзбекистоннинг туризм салоҳияти ва янги турпакетларини МАТТА рақамли платформаларида тарғиб этиш бўйича келишувларга эришилди.

Шунингдек, бир қатор хорижий компания ва туроператорлар билан музокараларда Тошкент халқаро туризм ярмаркаси имкониятлари таништирилди. Хусусан, ТХТЯ–2023 доирасида туризм соҳасидаги «Hosted buyers» профессионал харидорлар дастурида иштирок этиш бўйича келишиб олинди.
КУАЛА-ЛУМПУР, 4 сентябрь. /«Дунё» АА/.