Maqsad – huquqiy bilimni yuksaltirish

Toshkent aloqa kasb-hunar kollejida o‘rta maxsus, kasb-hunar ta’limi muassasalari o‘quvchilari o‘rtasida «Siz qonunni bilasizmi?» ko‘rik-tanlovining Toshkent shahar bosqichi bo‘lib o‘tdi.

Davlatimiz rahbarining 2014-yil 6-fevraldagi «O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida»gi qarori ijrosini ta’minlash maqsadida «Kamolot» YoIH hududiy bo‘limi, Toshkent shahar o‘rta maxsus, kasb-hunar ta’limi, adliya, ichki ishlar boshqarmalari hamkorligida tashkil etilgan tanlovda ta’lim muassasalari o‘qituvchilari, yoshlar ishtirok etdi.

Tadbirdan ko‘zlangan maqsad ta’lim muassasalari o‘quvchilarining huquqiy bilim va madaniyatini yuksaltirish, ularni O‘zbekiston Respublikasi Konstitutsiyasi va boshqa qonun hujjatlariga hurmat ruhida tarbiyalash, fuqarolik pozitsiyasini yanada mustahkamlashdan iboratdir.

Tanlovning tuman bosqichlarida g‘oliblikni qo‘lga kiritgan o‘n bir jamoa tanishtiruv, huquqiy bilimlar bo‘yicha savol-javob, videorolik taqdimoti, «Uy vazifasi» hamda «O‘zbekiston Respublikasida yoshlarga oid davlat siyosatining asoslari to‘g‘risida»gi qonunni o‘rganishga oid beshta shart bo‘yicha o‘zaro bahslashdi.

Toshkent to‘qimachilik va yengil sanoat instituti akademik litseyining «Senatorlar» jamoasi birinchi, 1-Toshkent pedagogika kollejining «Ombudsman» jamoasi ikkinchi, Toshkent moliya va iqtisodiyot kollejining «Adolat» jamoasi uchinchi o‘rinni egalladi.

– Tanlovning mamlakat bosqichiga yo‘llanma olganimizdan xursandmiz, – deydi «Senatorlar» jamoasi sardori Salohiddin Rasulov. – Ushbu tadbir bizga mamlakatimiz sud-huquq, ijtimoiy-iqtisodiy tizimida amalga oshirilayotgan islohotlar mazmun-mohiyatidan chuqurroq xabardor bo‘lish imkonini bermoqda.

www.uza.uz