OʻzLiDeP: Inson shaʼniga nisbatan qilingan har qanday tajovuz jazosiz qolmasligi kerak

Ayni paytda ijtimoiy tarmoqlar va internet OAVda Toshkent shahar hokimi J.Ortiqxoʻjayevga tegishli ekani aytilayotgan, jurnalist va blogerlar shaʼniga oʻta keskin fikrlar bildirilgan audioyozuv mamlakatimizdagi barcha OAV vakillari, blogerlar va keng jamoatchilikning keskin tanqidiga sabab boʻlmoqda. J.Ortiqxoʻjayev shaxsi bilan bogʻliq mazkur holat OʻzLiDePni ham befarq qoldirgani yoʻq. Partiya bu borada oʻz pozitsiyasini eʼlon qildi.

“Mamlakatimiz Konstitutsiyasida ham qonun hamma uchun tengligi, inson huquqlari ustuvorligi eʼtirof etilgan. Shu tufayli OʻzLiDeP inson shaʼniga nisbatan qilingan har qanday tajovuz jazosiz qolmasligi kerak deb hisoblaydi”, - deyiladi unda.

Shu bilan birga haqoratli soʻzlar yangragan audioyozuv haqiqatan ham J.Ortiqxoʻjayev tomonidan aytilganligi yuzasidan yetarlicha tasdiqlovchi dalillar mavjud boʻlmagani sababli ushbu masalaga munosib huquqiy baho berish, vaziyatga aniq xulosa yasash maqsadida audioyozuv hozirda maxsus davlat organlari tomonidan ekspertiza qilinayotganligi maʼlum. Shundan kelib chiqib partiya jurnalist va blogerlarni, turli davlat va nodavlat tashkilotlari faollarini vaziyatga ekspertiza xulosasi asosida baho berilgunga qadar xulosa chiqarmaslikka chaqirgan.

Shuningdek, matnda OʻzLiDeP Toshkent shahar hokimligi matbuot xizmatini yuzaga kelgan vaziyatga oydinlik kiritish maqsadida tegishli munosabat bildirishini soʻragan.

“...Partiya har qanday erkin fikr, erkin soʻz inson qadr-qimmatiga daxl qilmasligi shart deb hisoblaydi”, - deyiladi matbuot xizmati xabarida.

O’zA