“O’ZBEKISTON - MARKAZIY OSIYO GANJINASI: BARQARORLIK VA FAROVONLIKNING 25 YILI”

Yaqinda Varshavada O’zbekistonga bag’ishlab polyak tilida chop etilgan jurnalning maxsus soni ana shunday nomlanadi. U Polshadagi taniqli Publishing Haus Rea noshirlik uyi va mamlakatimizning Varshavadagi diplomatiya vakolatxonasi tomonidan o’zaro hamkorlikda nashr qilindi.

O’zbekiston Respublikasining tashqi iqtisodiy hamkorligi, iqtisodiyoti, ta’lim tizimi, bank sohasi hamda qishloq xo’jaligi singari juda muhim jabhalarda erishgan muvaffaqiyatlari haqidagi batafsil ma’lumotlar jurnal sahifalarida o’z ifodasini topgan.

Nashrda mamlakatimizda qonun ustuvorligini ta’minlash, uzluksiz ta’lim tizimi, “Sog’lom ona va bola yili” Davlat dasturining hayotga tadbiq etilishi, bolalar huquqlari va manfaatlarini himoya qilish, millatlararo va diniy bag’rikenglikning ta’minlanishi, sayyohlik industriyasini rivojlantirish kabi yo’nalishlardagi keng qamrovli ijobiy o’zgarishlar atroflicha yoritilgan.

Alohida ta’kidlanganidek, bugungi kunda O’zbekiston dunyoning mustaqil davlatlari qatorida o’zining munosib o’rnini egallagan, mamlakatimiz iqtisodiyot o’sishining barqaror sur’atlarini namoyish etmoqda. Hozirgi paytga qadar erishilgan natijalar mamlakatning bundan 25 yil avval tanlab olgan, taraqqiyotning o’zbek modeliga asoslangan bosqichma-bosqich rivojlanish yo’lining naqadar to’g’ri ekanligini tasdiqlamoqda.

Shu bilan birga, nashr sahifalaridan joy olgan maqolalarda O’zbekistonda yaratilgan sharoitlar islohotlarni izchil hayotga tadbiq etish, milliy iqtisodiyotni rivojlantirish, eksportga mo’ljallangan mahsulotlar turlarini ko’paytirish hamda jahon hamjamiyatiga faol integratsiyalashish imkonini bergani qayd etilgan.

Yuqoridagilar bilan bir qatorda mustaqillik yillari davomida o’zbek xalqining ma’naviy va madaniy merosini avaylab asrash borasida erishgan marralari haqida ham hikoya qilinadi.

Mamlakatimizning boy sayyohlik salohiyati xususidagi ma’lumotlar jurnal maxsus sonining alohida bo’limidan joy olgan. Mustaqil taraqqiyot yillari davomida ushbu sohani rivojlantirish borasida erishilgan keng qamrovli natijalar bilan tanishtirar ekan, nashr o’lkamiz bag’rida joylashgan betakror tarixiy yodgorliklar haqidagi ma’lumotlarni ham o’quvchilar e’tiboriga havola qilgan. Jannatmakon yurtimizning boy tarixi va madaniyati haqidagi materiallar ham polshalik jurnalxonlarda katta qiziqish uyg’otishi tayin.

O’z-o’zidan ayonki, O’zbekiston va Polshaning siyosiy, iqtisodiy va gumanitar sohalardagi hamkorligining hozirgi holati mavzusi ham atroflicha qalamga olingan. Ushbu mavzuga bag’ishlangan maqolada ikki mamlakat o’rtasidagi o’zaro manfaatli aloqalar tobora rivojlanib borayotgani hamda ular porloq istiqbolga ega ekanligi alohida qayd etilgan.

“Jahon” AA, Varshava