O’ZBEKISTON “YEVROOSIYO HAFTALIGI - 2015” XALQARO ANJUMANIDA

O’zbekiston delegatsiyasi Iqtisodiy hamkorlik va rivojlanish tashkilotining (IHRT) Parijdagi qarorgohida bo’lib o’tgan “Yevroosiyo haftaligi - 2015. Institutlarni optimallashtirish, o’zaro aloqadorlikni kuchaytirish va keng qamrovli o’sishni ta’minlash orqali Yevroosiyo mamlakatlari raqobatbardoshligini oshirish” mavzuiga bag’ishlangan xalqaro forumda ishtirok etdi.

Iqtisodiy hamkorlik va rivojlanish tashkilotining Yevroosiyo mamlakatlari raqobatbardoshligini oshirish dasturi 2008 yildan buyon hayotga tadbiq etilmoqda. Undan ko’zlangan asosiy maqsad milliy va mintaqaviy darajalarda bozorlar raqobatbardoshligi rivojlanishida mintaqa davlatlarining iqtisodiyotini qo’llab-quvvatlashdir. Ushbu dasturga Ozarbayjon, Armaniston, Afg’oniston, Belarus, Gruziya, Qozog’iston, Qirg’iziston, Moldova, Mongoliya, Tojikiston, Turkmaniston, O’zbekiston va Ukraina kirgan.

Parij anjumani ishida Iqtisodiy hamkorlik va rivojlanish tashkilotiga a’zo davlatlar hamda mazkur dasturga a’zo mamlakatlar hukumatlari, ishbilarmon va ekspert doiralari, boshqa qator xalqaro tashkilot va institutlarning vakillari, yevropalik biznesmen va ekspertlar ishtirok etdilar.

Tadbir chog’ida Yevroosiyo mamlakatlari raqobatbardoshligini oshirish bo’yicha chora-tadbirlarni amalga oshirishning borishi, jumladan, biznesni rivojlantirish imkoniyatlari, kichik va o’rta tadbirkorlikning o’rni, yashil iqtisodiyot va bandlikni ta’minlash bilan bog’liq masalalar ko’rib chiqildi.

Parij anjumanida mamlakatimiz delegatsiyasi tomonidan O’zbekistonning savdo-iqtisodiy va sarmoyaviy salohiyati, iqtisodiyotni diversifikatsiyalash va sanoatni modernizatsiyalash bo’yicha amalga oshirilayotgan keng qamrovli dasturlar, iqtisodiyotda davlatning roli va o’rnini qisqartirish, xususiylashtirish hamda korporativ boshqaruvning zamonaviy uslublarini qo’llash haqidagi atroflicha ma’lumotlar taqdim etildi. Shu bilan birga, ushbu anjuman ishtirokchilari joriy yil 5-6 noyabr kunlari Toshkentda bo’lib o’tgan Xalqaro investitsiyaviy forum yakunlari bilan ham tanishtirildi.

“Yevroosiyo haftaligi - 2015” doirasida O’zbekiston delegatsiyasi a’zolari Iqtisodiy hamkorlik va rivojlanish tashkiloti hamda yirik xorijiy kompaniyalar vakillari bilan muzokaralar ham o’tkazdilar. Bo’lib o’tgan uchrashuvlar chog’ida yevropalik tadbirkorlar O’zbekiston bilan o’zaro manfaatli amaliy hamkorlikni kengaytirish va chuqurlashtirishdan manfaatdor ekanliklarini ma’lum qilishdi.

“Jahon” AA, Parij