O’ZBEKISTONNING SAYYOHLIK SALOHIYATI SHANXAYDA TAQDIM ETILDI

Xitoyning Shanxay universitetida Madaniy qadriyatlar XI xalqaro yarmarkasi bo’lib o’tdi. Akademik, madaniy, jamoatchilik doiralari va ommaviy axborot vositalarining vakillari ushbu tadbirning ishtirokchilari bo’ldilar.

O’zbekiston Respublikasining Xitoy Xalq Respublikasidagi Bosh konsulligi mazkur yarmarkada mamlakatimizni namoyon etdi. Milliy uslubda bezatilgan O’zbekiston bo’lmasida o’lkamizning sayyohlik salohiyati va xalqimizning boy madaniy-tarixiy merosi hamda respublikamizda sayyohlik industriyasini rivojlantirish bo’yicha hayotga tadbiq etilayotgan chora-tadbirlar taqdimoti bo’lib o’tdi. Shu bilan birga, O’zbekistonning diqqatga sazovor maskanlari, ya’ni ma’lum va mashhur qadamjolari haqida hikoya qiladigan hujjatli film namoyishi ham yarmarka ishtirokchilarida katta taassurot qoldirdi. Tadbir doirasida uning qatnashchilari o’zbek milliy oshxonasi taomlaridan tatib ko’rish imkoniyatiga ham ega bo’ldilar.

O’zbekiston bo’lmasi bilan tanishgan Shanxay Ijtimoiy fanlar akademiyasi direktorining o’rinbosari Li Ixay mamlakatimizga bir necha marotaba borganini ma’lum qilar ekan, har safar yurtimizdan iliq va sira unutilmas taassurotlar bilan qaytganini aytdi.

— Navro’z kunlari O’zbekistonga borganim hali-hamon yodimda, - dedi u “Jahon” axborot agentligi uchun intervyu berar ekan. - Bu bayramning juda ko’tarinki ruhda nishonlanishi, hamma joyda sumalak va boshqa bahor taomlari tayyorlanishi, xalq sayillari va bayram tomoshalari xuddi kechagidek ko’z o’ngimda turadi. O’zbekistonning rivojlanishini hamda jamiyat hayotining barcha sohalarida amalga oshirilayotgan islohotlarni Xitoyda diqqat bilan kuzatib borishadi. Ishonchim komilki, hayotga tadbiq etilayotgan islohotlar mamlakatingizning izchil taraqqiyotiga, tinchlik va hamjihatlik muhitining mustahkamlanishi hamda aholi farovonligining yuksalishiga ko’maklashadi.

“Jahon” AA, Shanxay