Президент «Аҳолини рўйхатга олиш тўғрисида»ги Қонунни имзолади

ТОШКЕНТ, 17 март. /«Дунё» АА/. Ўзбекистон Республикаси Президенти Шавкат Мирзиёев «Аҳолини рўйхатга олиш тўғрисида»ги Қонунни имзолади, деб хабар бермоқда «Дунё» АА мухбири Адлия вазирлиги манбасига асосланиб.

Аҳолини рўйхатга олиш – бу Ўзбекистон Республикасининг аҳолиси тўғрисида ишончли ва холис ахборот йиғишдир. Қонун билан аҳолини рўйхатга олишнинг асосий тамойиллари белгиланди, булар:

 даврийлик;

 умумийлик ва бир пайтда амалга ошириш;

 рўйхатга олишнинг якка тартибда ташкил этилиши;

 шахсга доир маълумотлар махфийлиги;

 аҳолини рўйхатга олишни бошқаришнинг марказлаштирилгани.

Аҳолини рўйхатга олиш соҳасини давлат томонидан тартибга солиш Ўзбекистон Республикаси Вазирлар Маҳкамаси, мамлакатда аҳолини рўйхатга олишни ўтказишга кўмаклашиш бўйича республика комиссияси, аҳолини рўйхатга олиш соҳасидаги махсус ваколатли (Давлат статистика қўмитаси), шунингдек, маҳаллий давлат ҳокимияти органлари томонидан ўз ваколати доирасида амалга оширилади.

Қонун билан ушбу органларнинг бу соҳадаги ваколатлари белгиланди. Аҳолини рўйхатга олишни ташкил этиш учун масъул вазирлик, давлат қўмиталари ва идоралари эса ваколатли давлат органларига кўмаклашади.

Қонун расмий эълон қилинган кундан эътиборан кучга киради.