Ўзбекистон Конституциясидаги ўзгартишлар, биринчи навбатда, мамлакат аҳолисининг ҳуқуқ ва манфаатларини таъминлашга қаратилган

Германияда ташриф билан бўлган Ўзбекистон ташқи ишлар вазирининг ўринбосари Эркин Ҳамроев «Бонн-Бухоро» Германия-Ўзбекистон дўстлик жамияти раҳбарлари Колин Дюркоп ва Оксана Тен билан учрашув ўтказди, деб хабар бермоқда «Дунё» АА муҳбири.

Учрашув мамлакатимизнинг Франкфурт-Майн шаҳридаги Бош консулхонаси кўмагида ташкил этилди.

Унда Германия томонига мамлакатимизда амалга оширилаётган ислоҳотлар, хусусан, конституциявий қонун лойиҳаси, Асосий қонунга киритиш таклиф этилаётган ўзгартиш ва қўшимчаларнинг мазмун-моҳияти ҳамда аҳамияти ҳақида атрофлича маълумот берилди.

Конституцияга киритилиши режалаштирилаётган барча ўзгартиш ва қўшимчалар, биринчи навбатда, инсон қадр-қиммати, фаровонлиги ва манфаатларини ҳимоя қилиш, шунингдек, инсонпарвар, демократик, ҳуқуқий, ижтимоий, дунёвий давлат барпо этиш ва уни мустаҳкамлашга қаратилгани алоҳида таъкидланди.

Германия-Ўзбекистон жамияти вакиллари мамлакатимизда кечаётган жараёнларни диққат билан кузатиб боришини, ижобий ўзгаришларни юксак қадрлашини ҳамда давлатимиз раҳбарининг республика тинчлиги ва изчил ривожланишини таъминлаш борасидаги саъй-ҳаракатларини ҳар томонлама қўллаб-қувватлашини таъкидлади.

Хусусан, «Бонн-Бухоро» дўстлик жамияти президенти Колин Дюркоп Ўзбекистондаги конституциявий ислоҳотлар ҳақида қуйидагиларни айтиб ўтди.

— Ўзбекистон Конституцияга ўзгартишлар киритиш орқали демократлаштиришга интилмоқда, - деди у. - Бу давлат аппаратини ўзгартириш, унинг шаффофлиги ва ҳисобдорлигини ошириш йўлидаги катта қадам бўлади.

Қолаверса, бу Ўзбекистоннинг ҳозирги сиёсий тизимида янада очиқлик томон ўзгарган парадигмадир. Шунинг учун ҳам туб ўзгаришлар натижасида инсон манфаатлари биринчи ўринга қўйилмоқда, конституциявий қонунчилик орқали «давлат – жамият – шахс» тамойили «инсон – жамият – давлат»га алмаштирилмоқда.

Мамлакатда оила, анъанавий инсоний қадриятлар ва миллатлараро тотувликка оид конституциявий нуқтаи назарни ўзгартириш орқали Ўзбекистон инсон ҳуқуқлари мустаҳкам ҳимоя қилинган давлатга, шунингдек, барқарор ижтимоий-иқтисодий ва сиёсий тараққиёт ҳамда барқарорликни таъминловчи кучга айланади.

Ўзбекистон Конституциясига инсон ҳуқуқлари, ижтимоий ҳимоя, тараққиёт, давлат бошқаруви, таълим, соғлиқни сақлаш, иқтисодий тенглик, очиқлик ва ошкоралик нуқтаи назаридан ўзгартиш киритишнинг устувор йўналишлари таҳсинга лойиқ. Буларнинг барчаси халқ ва давлатни фаровонлик сари етаклайди.

«Дунё» АА