Ўзбекистон мустақиллигининг 32 йиллиги Япониянинг машҳур газеталари нигоҳида

Япониянинг машҳур “Japan Times” ҳамда “Japan News” газеталарида мамлакатимиз элчиси Мухсинхўжа Абдураҳмоновнинг “Ўзбекистон Мустақилликнинг 32 йиллиги: Янги ҳаёт учун, Янги Ўзбекистон учун” сарлавҳали мақоласи чоп этилди, деб хабар бермоқда «Дунё» АА мухбири.

“Истиқлол йилларида ўзбек халқи шарафли йўлни босиб ўтди. Айниқса, сўнгги етти йил давомида Шавкат Мирзиёев раҳнамолигида юртимизда амалга оширилган кенг кўламли ислоҳотлар ижтимоий ҳаётнинг барча жабҳаларида янгиланиш ва туб ўзгаришларга асос бўлаётир”, деб ёзади муаллиф.

Таъкидланганидек, ўтган етти йилда амалга оширилган буюк бунёдкорлик ишлари, жумладан мамлакатда инсон ҳуқуқларини ҳимоя қилиш, мажбурий меҳнатга қарши кураш, ОАВ ва сўз эркинлигини таъминлаш, фуқаролик жамияти институтларини ривожлантириш каби бир қатор соҳаларда эришилган улкан муваффақиятлар натижасида «Янги Ўзбекистон» номи халқаро майдонда кўпроқ тилга олинмоқда.

Ўзбекистон Президенти Шавкат Мирзиёевнинг 2019 йил декабрь ойида Японияга расмий ташрифи икки мамлакат ўртасида сўнгги йилларда изчил ривожланаётган муносабатларни янги босқичга кўтаргани қайд этилади.

Ўзбекистон ва Япония ўртасидаги муносабатларни ривожлантиришнинг мустаҳкам ҳуқуқий асоси ўлароқ шу кунга қадар 180 га яқин ҳужжатлар имзолаган.

Элчи Япониялик газетхонлар эътиборларини икки давлат ўртасидаги муносабатларнинг устувор йўналишлардан бири бўлган иқтисодий ҳамкорликнинг бугунги ҳолати ва истиқболларига қаратди.

Ўзаро савдо алоқаларда энг қулай тартиб жорий қилингани, мамлакатлар ўз экспорт салоҳиятидан машинасозлик, металлургия, хизмат кўрсатиш ва бошқа соҳаларда фаол фойдаланаё тгани айтилган. Расмий маълумотга кўра, 2022 йилда ўзаро савдо айланмаси қарийб 250 миллион АҚШ долларини ташкил этган.

Икки мамлакат ўртасида иқтисодий ҳамкорлик бўйича Ўзбекистон-Япония ва Япония-Ўзбекистон қўмиталари фаолият кўрсатаётгани, шу кунгача қўмитанинг 16 та йиғилиши бўлиб ўтгани таъкидланган.

Икки томонлама маданий-гуманитар соҳадаги ҳамкорликка ҳам алоҳида эътибор қаратилган. “2001 йил Тошкент марказида очилган «Япон боғи» ўзбекистонликларнинг ҳордиқ чиқарадиган ва турли тантанали тадбирлар ўтказадиган севимли масканига айланган”.

Таълим соҳасидаги ҳамкорлик тўғрисида ҳам маълумот берилган бўлиб, таъкидланишича, “бугун ўзбекистонлик кўплаб ёшлар Японияда таълим олишга интилмоқда. Мамлакат йигит-қизлари япон тилини қизиқиб ўрганишмоқда. Япон тилини ўрганиш республиканинг бир қатор олий ўқув юртлари таълим дастурларига киритилган. Шунингдек, Япония халқаро ҳамкорлик ташкилотининг (JICA) минтақавий ваколатхонаси кўмагида қатор университетларда япон тилини ўрганиш марказлари очилган”.

“Ўтган йилларда Ўзбекистон билан Япония ўртасидаги муносабатлар ўзаро ҳурмат, ишонч ва фойдали шериклик руҳида ривожланиб бормоқда. Икки давлат халқларининг мустаҳкам дўстлик ришталари ўзаро муносабатларни янада чуқурлаштиришга ундайди”, - деб ёзади Япония нашрлари.

Япон газеталарининг ушбу мақолалар чоп этилган сонида мамлакатимиз билан самарали ҳамкорлик қилиб келаётган “Toyota Tsusho”, “Marubeni”, “Itochu Corporation”, “Sumitomo Corporation”, “Overseas Merchandise Inspection Co., Ltd”, “AOI Group”, “Balcom Co., Ltd.” каби машҳур компанияларнинг Ўзбекистон давлат мустақиллигининг 32 йиллиги муносабати билан республикамизнинг кўпмиллатли халқига байрам табриклари ҳам босилган.
ТОКИО, 4 сентябр. /«Дунё» АА/.