Ўзбекистоннинг бизнесни ривожлантириш бўйича белгилаган йўналишлари Сингапур ОАВ диққат марказида

Сингапурда нашр этиладиган “Indiplomacy” журналининг веб саҳифасида Ўзбекистон Республикаси Президенти ҳузуридаги Иқтисодий тадқиқотлар ва ислоҳотлар маркази директори Обид Ҳакимов қаламига мансуб “Кичикдан ўртага, ўртадан каттага” сарлавҳали мақола эълон қилинди, деб хабар бермоқда “Дунё” АА мухбири.

Мазкур мақолада жорий йил 18 август куни Президент Шавкат Мирзиёевнинг тадбиркорлар билан учинчи очиқ мулоқоти тафсилотлари қаламга олинган.

Муаллиф илк очиқ мулоқот давлатимиз раҳбарининг таклифига биноан, 2021 йил 20 августда ташкил этилганини қайд этар экан, шундан буён мазкур формат яхши анъанага айлангани ва ушбу сана мамлакатимизда Тадбиркорлар куни этиб белгиланганини таъкидлайди. “Бу Ўзбекистонда шу каби биринчи тажриба бўлиб, бизнесга нисбатан олиб борилаётган иқтисодий сиёсатни оптималлаштириш нуқтаи назаридан ўзининг юқори самарадорлигини кўрсатишга улгурди, кейинги йилларда тадбиркорликни ривожлантириш соҳасидаги натижалар ҳам шуни кўрсатмоқда”, деб ёзади у.

Мақола муаллифи яқинда ўтказилган мулоқотда ўтган йилги анжуманда белгиланган йўналишлар бўйича бир йил давомида амалга оширилган ишларга баҳо берилганига тўхталар экан, ўтган йил илгари сурилган таклифлар асосида бизнес субъектлари микро, кичик, ўрта ва йирик тоифаларга ажратилиб, уларнинг ҳар бирига алоҳида ёндашув қўлланила бошланганини, худди шунингдек, туман ва шаҳарлар ҳам 5 тоифага бўлиниб, 60 туманда алоҳида солиқ, кредит ва молиявий режимлар жорий этилганини маълум қилган. Бунинг натижасида ўтган олти ойда мазкур туманлардаги тадбиркорлар қарийб 1 триллион сўмлик имтиёзлардан фойдалангани, бунинг ҳисобига 20 туманда тадбиркорлар даромадлари ўтган йилга нисбатан 1,5-2 баробаргача ошгани қайд этилган.

Шунингдек, мақолада қўшилган қиймат солиғини қайтариш муддати қисқартирилгани, кредитлаш соҳасида айланмадаги товарлар, экспорт шартномалари, аккредитивлар ва келгуси тушумлардан ҳам гаров таъминоти сифатида фойдаланиш тизими яратилгани, божхона ҳудудида қайта ишлаш тизими соддалаштирилгани, бир пайтлари янги тадбиркорлар учун “кириш қийин бўлган” 119 фаолият тури учун лицензия ва рухсатномалар бекор қилингани ёки хабардор қилиш шаклига ўтказилгани ҳамда бу ўзгаришларнинг самаралари ҳақида атрофлича қалам тебратган.

“Тадбиркорлар билан аввалги мулоқотдан сўнг, ўтган бир йил давомида кичик тадбиркорлар сони яна 40 мингга кўпайиб, 490 мингни ташкил этди. Ўрта тадбиркорлар сони эса 2 мингга ошди ва 10 мингга етди. Йирик корхоналар сони йил давомида 400 тага ортиб, 1,5 мингтани ташкил этмоқда”, деб ёзади муаллиф.

Шунингдек, мақолада тақдим этилаётган имтиёзлардан фойдаланиш натижалари тўғрисидаги аниқ-равшан далил ва рақамлар ҳам ўз ифодасини топган. Унда Президентимиз Шавкат Мирзиёев жорий йили бўлиб ўтган тадбиркорлар билан мулоқот чоғида сўзлаган нутқида келгусида бизнес ва тадбиркорлик ривожини қўллаб-қувватлашнинг бешта асосий йўналишини белгилаб берганига доир маълумотларга алоҳида эътибор қаратилган.

Юқоридагилар билан бирга мақолада ўрта бизнесни ривожлантириш билан боғлиқ ташаббуслар, рақобатбардош маҳсулотлар билан янги бозорларга кириш, юқори даромадли корхоналар лойиҳалари, солиқ маъмуриятчилигининг соддалаштирилиши, тадбиркорларнинг очиқ-ошкора рейтинги жорий этилишига доир муҳим маълумотлар ҳам ўқувчилар эътиборига ҳавола қилинган.

СИНГАПУР, 13 сентябрь. /«Дунё» АА/.