XMT RAHBARI: “O’ZBEKISTON BILAN HAMKORLIK UCHUN YANGI IMKONIYATLAR ESHIGI OCHILMOQDA”

Ilgari xabar berilganidek, Jeneva shahrida bo’lib o’tgan Xalqaro mehnat konferensiyasining 106-sessiyasida O’zbekiston delegatsiyasi ishtirok etdi.

Tadbir doirasida mamlakatimiz Bosh vazirining o’rinbosari - O’zbekiston Xotin-qizlar qo’mitasi raisi Tanzila Norboyeva, O’zbekiston Respublikasi Bandlik va mehnat munosabatlari vaziri Aziz Abduhakimov, Savdo-sanoat palatasi raisi Alisher Shayxov va Kasaba uyushmalari federatsiyasi kengashi raisining o’rinbosari Baxtiyor Mahmadaliyev Xalqaro Mehnat tashkiloti (XMT) Bosh direktori Gay Rayder bilan uchrashuv o’tkazdilar.

Xalqaro Mehnat tashkiloti rahbari O’zbekistonda ijtimoiy-iqtisodiy rivojlanish va aholi uchun munosib mehnat sharoitlarini ta’minlash yuzasidan amalga oshirilayotgan islohotlar va ular berayotgan natijalar bilan yaqindan tanishdi. Shu o’rinda davlatimiz rahbarining ijtimoiy mehnat jabhasini, ish haqi, nafaqa va stipendiyalar to’lash tizimini takomillashtirish hamda aholiga tibbiy xizmat ko’rsatishni yaxshilashga yo’naltirilgan farmon va qarorlarining mazmun-mohiyati xususida atroflicha fikr yuritildi.

Xalqaro Mehnat tashkiloti Bosh direktori G. Rayder “Jahon” axborot agentligiga bergan intervyusi chog’ida O’zbekiston bilan munosabatlar o’z tashkiloti uchun juda muhim ahamiyatga ega ekanligini ma’lum qildi. Uning aytishicha, shu kunga qadar tomonlar o’zaro hamkorlikning ko’pgina yo’nalishlari bo’yicha salmoqli muvaffaqiyatlarga erishgan bo’lsa, hozirgi paytda bandlik, mehnatni muhofaza qilish va gender tengligi masalalarida ham yangi imkoniyatlarning eshiklari ochilmoqda.

G. Rayder Prezidentimiz Shavkat Mirziyoyev rahbarligida ishlab chiqilgan 2017-2021 yillarda O’zbekiston Respublikasini rivojlantirishning beshta ustuvor yo’nalishi bo’yicha Harakatlar strategiyasiga ijobiy baho berar ekan, unda ijtimoiy soha ustuvor yo’nalishdan biri sifatida belgilanganini aytdi. U O’zbekistonda munosib mehnat bo’yicha Davlat dasturining amalga oshirilishiga hamda halqaro mehnat andozalariga asosan tadbiq etilgan mehnat me’yorlariga yuqori baho berdi.

Bosh direktor Xalqaro Mehnat tashkilotining Birlashmalar erkinligi va kasaba uyushmalariga birlashish huquqini himoya qilish to’g’risidagi 87-sonli Konvensiyasi ratifikatsiya qilingani uchun O’zbekiston rahbariyatiga alohida minnatdorlik bildirdi. “Umid qilamizki, Xalqaro Mehnat tashkilotining boshqa konvensiyalari respublikaning milliy qonunchiligiga muvofiqligini o’rganish bo’yicha ishlar davom etadi”, dedi u.

G.Rayder ikki tomonlama hamkorlikni bundan-da kengaytirish, huquqiy zaminni yanada takomillashtirish, hamkorlik rejalari va amaliy chora-tadbirlarni birgalikda ishlab chiqish zarur ekanligini ham ta’kidladi.

“Jahon” AA, Jeneva