Япониянинг машҳур телеканалида Ўзбекистон ҳақида туркум кўрсатувлар намойиш этилди

Япониянинг машҳур "MBS" телеканалининг оммабоп "Yon-Chan TV" дастурида Ўзбекистонга бағишланган кўрсатувлар намойиш этилди, деб хабар қилмоқда "Дунё АА мухбири.

Мазкур лойиҳа мамлакатимиз элчихонаси томонидан Туризм қўмитаси, Ўзбекистон миллий телерадиокомпанияси, Халқаро Пресс-клуб ва Ўзбекистон маданият ва санъатни ривожлантириш жамғармаси билан ҳамкорликда 2025 йилда Осака шаҳрида бўлиб ўтадиган "Expo Osaka 2025" бутунжаҳон кўргазмаси доирасида ташкил этиладиган Ўзбекистон миллий павильони ҳақида япон жамоатчилигини хабардор қилиш, шунингдек, юртимизнинг иқтисодий-туристик салоҳиятини кенг тарғиб қилиш мақсадида ишлаб чиқилди.

"Mainichi Broadcasting System, Inc.," медиа компанияси ижодий гуруҳи шу йилнинг 22-27 январь кунлари ижодий сафар билан мамлакатимизда бўлди ва туркум кўрсатувларни суратга олди.

"MBS" дастлаб Тошкент шаҳрига бағишланган махсус кўрсатувни эфирга узатди. Унда пойтахтимиз Марказий Осиёнинг энг йирик ва жадал суратларда ривожланиб бораётган шаҳри сифатида эътироф этилган. Машур япониялик телебошловчи Ҳарука Маэда Ўзбекистон миллий телерадиокомпанияси фаолияти билан танишуви ва Халқаро пресс-клубнинг Осака шаҳридаги жаҳон кўргазмасига бағишланган махсус сессиясидаги иштироки ҳақида ҳикоя қилган.

Кўрсатув бошловчиси Ҳарука Маэда Тошкент шаҳридаги "Беш қозон" ош марказида бўлгани ва ўзбек миллий таоми – палов тайёрлаш жараёнлари ҳақида томошабинларга сўзлаб берган. У улкан қозонларда тайёрланадиган паловнинг мазаси барчага бирдек манзур келишини таъкидлаган.

Навбатдаги манзил - Тошкент метроси. Маэда хоним "Алишер Навоий" ва "Космонавтлар" метро бекатлари бўйлаб сайр қилиб, уларнинг ўзига хослиги ва такрорланмас архитектураси хорижий сайёҳларда катта таассурот қолдиришини таъкидлайди. Йўл-йўлакай йўловчилар билан қизиқарли интервьюлар ҳам ташкил этиган.

Кўрсатувнинг иккинчи қисми Самарқанд шаҳрининг туризм салоҳиятига бағишланган. Унда Самарқанднинг тарихий обидалари – "Регистон" ансамбли, "Бибихоним" масжиди ва Буюк ипак йўлидаги афсонавий Сиёб бозори ҳақида томошабинларга сўзлаб берилган. Шунингдек, Сиёб бозори бўйлаб мевалар, озиқ-овқат маҳсулотлари ва халқ амалий санъатининг нодир намуналари ҳақида ҳикоя қилинган.

Кўрсатувда, шунингдек, "Самарқанд – Бухоро ипак гилами" фабрикаси фаолияти батафсил ёритилган. "Бу ердаги қўлда тўқилган сўзанилар, ипак гиламлар, кийим-кечак, шарф ва бошқа маҳсулотларнинг ноёблиги ҳамда 3 асрлик ҳунармандчилик санъат асари даражасига олиб чиқилган. Маҳсулотлар яратилишида маҳаллий хом ашё ва табиий бўёқлар ишлатилади, ҳар бир ип ва рангнинг ўзга хослиги уларнинг абадий нафислик ва ноёблигини таъминлайди", – дейди бошловчи.

Кўрсатувнинг Ўзбекистонга бағишланган махсус сонлари япон жамоатчилиги томонидан илиқ қабул қилинди. Ушбу махсус кўрсатувлар кўргазма доирасида такроран эфирлар узатилиши режалаштирилган.

2025 йилнинг 13 апрелдан 13 ноябрга қадар Япониянинг Осака шаҳрида "Expo Osaka-2025" бутунжаҳон кўргазмаси бўлиб ўтади. Тадбирда 170 дан ортиқ давлатнинг технологик, фан, иқтисодий ва маданий ютуқлари намойиш этилади. Кўргазма Осака кўрфазидаги сунъий Юмешима оролида ташкил этилади.

Мазкур кўргазмада 750 квадрат метр майдонда икки қаватли "Билимлар боғи" мавзусида Ўзбекистон миллий павильони бунёд этилади. Қурилиш ишлари 2024 йил март ойида бошланган.