Америка ишбилармон доиралари иштирокидаги махсус брифинг ўтказилди

Ўзбекистонда бўлиб ўтиши режалаштирилган муддатидан илгари Президент сайловига тайёргарлик кўриш чора-тадбирлари доирасида, шунингдек, мамлакатимизда амалга оширилаётган иқтисодий ислоҳотлар ҳақида батафсил маълумот бериш мақсадида Америка ишбилармон доиралари вакиллари ишитирокида махсус брифинг ўтказилди, деб хабар бермоқда “Дунё” АА мухбири.

Тадбирда Американинг нуфузли компаниялари, жумладан “Coca-Cola”, “CNH Industrial”, “General Motors”, “Boeing Company”, “Procter & Gamble”, “Silverleafe Capital Partners”, “SpaceX”, “Zeppelin Machinery”, “Honeywell”, “John Deere”, “Valmont Industries” ва “Epsilon Development Company” раҳбарлари, шунингдек, АҚШ Давлат департаменти ва Савдо вазирлиги вакиллари иштирок этди.

Брифинг аввалида элчи Фурқат Сидиқов томонидан Ўзбекистонда амалга оширилаётган кенг кўламли ислоҳотларнинг мазмун-моҳияти ва аҳамияти, муддатидан илгари Ўзбекистон Президенти сайловларига тайёргарлик жараёнлари, мамлакатимиз иқтисодиётини ривожлантириш, хорижий компаниялар учун кенг имкониятлар яратиш ва республикада ишбилармонлик муҳитини қўллаб-қувватлашда муҳим ўзгартиришлар киритилган Конституциявий Қонун референдум якунлари ҳамда Ўзбекистон ва АҚШ ўртасидаги савдо алоқалари юзасидан батафсил маълумот тақдим этилди.

Америка-Ўзбекистон Савдо палатаси (AUCC) раиси Кэролин Лэмм Ўзбекистонда амалга оширилаётган сўнгги ислоҳотлар, хусусан, ишбилармонлик муҳити ва Ҳукумат томонидан халқаро инвесторлар учун яратилаётган шарт-шароитларни юксак баҳолади. Кэролин Лэмм Ўзбекистоннинг янги Конституциясида ҳам маҳаллий, ҳам халқаро бизнес инвесторларининг ҳуқуқ ва имкониятлари мустаҳкамланганини алоҳида эътироф этди. “Икки давлат ўртасидаги савдо алоқаларини ривожлантириш тарафдори сифатида мен Америка компанияларини Ўзбекистонда бизнес юритиш истиқболларини мустаҳкамлашга ва уларни ўзбек бозорига кўпроқ сармоя киритишга чақираман”, деб қўшимча қилди К.Лэмм.

“Silverleafe Capital Partners” президенти Дэн Паттерсон 2018 йилдан буён пахта ишлаб чиқариш бўйича Ўзбекистон билан ҳамкорлик қилиб келаётганини таъкидлаб, Ҳукуматимизнинг тўқимачилик саноатига эътибори кучайиб бораётганини таъкидлади. “Ўзбекистон тўқимачилик саноати сўнгги йилларда сезиларли ўсишга гувоҳ бўлиб, ҳамкорлик имкониятлари учун жозибадор соҳага айланди”, деб таъкидлади Д.Паттерсон.

Унинг сўзларига кўра, Америка брендлари томонидан Ўзбекистон тўқимачилик корхоналари билан ҳамкорлик қилишга қизиқиш билдирилаётгани республика тўқимачилик маҳсулотлари сифати ва рақобатбардошлигига бўлган ишончдан далолат беради. Шу муносабат билан “Silverleafe” президенти Ўзбекистон тўқимачилик компаниялари ва Америка брендлари раҳбарлари ўртасида учрашувлар ташкил этишга тайёрлигини билдирди.

“CNH Industrial” компанияси вице-президенти Стив Надерни АҚШ компаниясининг Ўзбекистон билан қишлоқ хўжалиги техникаси соҳасида сўнгги 20 йил давомидаги кенг кўламли ҳамкорлик қилиб келаётганини таъкидлади. Унинг сўзларига қўра, “CNH Industrial” илғор қишлоқ хўжалиги техникаси ва тажрибаларини тақдим этиш орқали Ўзбекистон ушбу соҳа саноатини модернизация қилиш ва унумдорлигини қўллаб-қувватлашни мақсад қилган. Шу нуқтаи назардан, С.Надерни Ўзбекистонда қишлоқ хўжалиги соҳасида фаолият юритаётган завод ва фабрикалар жиҳозларини модернизация қилишда ўзбек ҳамкорлар билан фаол ҳамкорликни давом эттиришни билдирди.

“Valmont Industries” компанияси президенти Джош Диксон янги таҳрирдаги Конститутциядаги иқтисодий соҳага оид ўзгаришларнинг ижобий томонларини алоҳида қайд этди. “Конституцияга киритилган ўзгартиришлар мамлакатингизда янада қулай ишбилармонлик муҳитини яратишга қаратилган бўлиб, бу ўз навбатида хорижий компаниялари учун Ўзбекистонда ўз фаолиятларини янада кенгайтириш имкониятларини тақдим этади”, деди Дж.Диксон.

“Ўзбекистоннинг ирригация тармоғидаги иштирокимиз мамлакат қишлоқ хўжалиги ривожланишини қўллаб-қувватлаш ва деҳқонлар дуч келаётган сув ресурсларини бошқариш муаммоларини ҳал қилишда фаол иштирок этмоқдамиз”, деб таъкидлади Дж.Диксон.

Тадбир якунида АUСС ва АҚШ компаниялари раҳбарлари Ўзбекистонда амалга оширилаётган ислоҳотларни қатъий қўллаб-қувватлашларини, Америка компанияларини республика бозорига киришга ундашларини ва янги инвестиция лойихалари устида ишлашда давом этишларини таъкидладилар. Шунингдек, Америка томони билан АUСС нинг ташкил этилганининг 30 йиллиги арафасида жорий йилнинг сентябрь ойида Вашингтон шаҳрида “Америка–Ўзбекистон бизнес-форуми”ни ўтказиш бўйича келишувга эришилди.
ВАШИНГТОН, 12 июнь. /«Дунё» АА/.