ASHXABODDA “RAVON”NING TAQDIMOTI BO’LIB O’TDI

Turkmaniston poytaxtida O’zbekiston avtomobil sanoatining yangi namunasi - “Ravon”ning taqdimoti o’tkazildi.

“Turkman-O’zavto” qo’shma korxonasi tomonidan O’zbekistonning ushbu mamlakatdagi elchixonasi hamkorligida tashkil etilgan tadbirda Turkmaniston vazirlik va idoralari, Ashxabodda akkreditatsiyadan o’tgan diplomatik korpus va xalqaro tashkilotlar hamda ishbilarmon doiralar vakillari, keng jamoatchilik va OAV jurnalistlari ishtirok etdilar.

Yig’ilganlar e’tiboriga mamlakatimizda yo’lga qo’yilgan avtomobilsozlik sanoati yorqin misol bo’lgan O’zbekistonning sanoatlashgan-innovatsion iqtisodiyotni rivojlantirish borasida erishgan yutuqlari haqida ma’lumot berildi.

O’zbekiston bugun dunyodagi 30 ta avtomobil ishlab chiqaruvchi yirik mamlakatlar klubiga a’zo bo’lgan Markaziy Osiyodagi yagona davlat hisoblanishi alohida ta’kidlandi.

Tadbirda so’zga chiqqanlar tarmoqning mamlakat aholisi farovonligini oshirishda tutgan o’rni haqida to’xtalib, ushbu soha O’zbekiston iqtisodiyotidagi yetakchi yo’nalishlardan biri sanalishi va yuz minglab fuqarolarni ish bilan ta’minlaganini qayd etdilar. Xususan, mehmonlar e’tibori O’zbekiston avtosanoat tizimida 200 dan ziyod korxona faoliyat yuritishi, ular tomonidan ishlab chiqariladigan 20 dan ortiq mahsulot turlariga dunyoning turli mamlakatlarida talab yuqori ekanligiga qaratildi.

“Jahon” AA, Ashxabod