“Bahor simfoniyasi” dillarga zavq bag‘ishladi

“O‘zbekiston” xalqaro anjumanlar saroyida 25-mart kuni Yoshlar yig‘ma simfonik orkestri va iste’dodli yosh opera ijrochilari ishtirokida “Bahor simfoniyasi” deb nomlangan konsert bo‘lib o‘tdi.

Unga davlat va jamoat tashkilotlari, mamlakatimizda faoliyat ko‘rsatayotgan xorijiy diplomatik korpus va xalqaro tashkilotlar vakolatxonalari vakillari, O‘zbekiston Prezidenti saylovini kuzatish uchun kelgan chet ellik mehmonlar, musiqa ixlosmandlari taklif etildi.

Inson ma’naviyatini yuksaltirish, uning qalbi va ongida ezgu g‘oyalarni qaror toptirish, millatlar va xalqlar o‘rtasidagi do‘stlik va hamjihatlikni, madaniy-ma’rifiy rishtalarni mustahkamlashda musiqa san’atining ahamiyati beqiyos.

Mamlakatimizda musiqa san’atining barcha yo‘nalishlarini izchil ravnaq toptirish, soha vakillarini har jihatdan qo‘llab-quvvatlashga alohida e’tibor qaratilmoqda. Bu jarayonda turli tanlov va festivallar iste’dodli yoshlarni aniqlash, ular qalbida san’atga mehr-muhabbat tuyg‘ularini kamol toptirish, qobiliyati va salohiyatini namoyon etishi uchun ko‘mak berish, ijodiy hamkorlikni kengaytirish kabi ezgu maqsadlarga xizmat qilmoqda.

Yurtimizning turli hududlarida jahon andozalariga javob beradigan oliy, o‘rta maxsus ta’lim, madaniyat va san’at maskanlari barpo etilib, mavjudlari rekonstruksiya qilindi. O‘zbekiston Respublikasi Prezidentining 2008-yil 8-iyuldagi “Bolalar musiqa va san’at maktablarining moddiy-texnik bazasini mustahkamlash va ularning faoliyatini yanada yaxshilash bo‘yicha 2009-2014-yillarga mo‘ljallangan Davlat dasturi to‘g‘risida”gi qarori navqiron avlodning badiiy-estetik didini to‘g‘ri tarbiyalash, ko‘plab yosh iste’dodlarni yuzaga chiqarishda yangi ufqlarni ochib berdi.

Musiqa ta’limini sifat va mazmun jihatdan yangi bosqichga olib chiqish borasidagi islohotlar samarasida O‘zbekiston yoshlari har yili nufuzli xalqaro ko‘rik-tanlovlar, san’at festivallari, konsertlarda muvaffaqiyat qozonib, sovrinli o‘rinlarga sazovor bo‘lmoqda.

Mamlakatimizda an’anaviy tarzda o‘tkazilayotgan «Sharq taronalari», «Yagonasan, muqaddas Vatan!», «Toshkent bahori» kabi nufuzli festivallar istiqlol yillarida musiqa san’atining barcha yo‘nalishlarida erishilgan ulkan yutuq va marralarni muxlislarga namoyon etishda, bu boradagi ijodiy muloqotni yanada kengaytirishda muhim ahamiyat kasb etmoqda. Buning samarasida o‘zbek dirijyorlik, sozandalik, vokal, bastakorlik, opera ijrochiligi maktablari an’analari yanada boyib bormoqda. «Competizione dell’Opere» opera ijrochilari xalqaro tanlovi, «Yoshlik bahori» san’at festivali, «Ona yurt ohanglari», «Sozlar navosi» kabi yosh musiqachilar tanlovlarining muvaffaqiyatli tashkil etilayotgani yangidan-yangi iste’dod sohiblarini kashf etish bilan birga, o‘zbek musiqa san’atining jahon miqyosidagi ixlosmandlari tobora ortib borishida muhim omil bo‘lmoqda. “Nihol” mukofotining ta’sis etilgani musiqaning barcha yo‘nalishlari bo‘yicha yosh iste’dodlarni aniqlash, ularni keng jamoatchilikka tanishtirish, ijodini yanada yuqori bosqichga ko‘tarishda alohida ahamiyat kasb etmoqda.

...«O‘zbekiston» xalqaro anjumanlar saroyi musiqa ixlosmandlari bilan gavjum. Kamalakrang nurlar, rang-barang chiroqlar saroyga yanada joziba, shukuh bag‘ishlaydi.

O‘zbekiston Respublikasi Madaniyat va sport ishlari vazirligi, “Kamolot” yoshlar ijtimoiy harakati, O‘zbekiston milliy simfonik, kamer, xalq cholg‘ulari orkestrlari jamoalari birlashmasi hamda Toshkent shahar hokimligi hamkorligida tashkil etilgan mazkur konsertdan ko‘zlangan maqsad navqiron avlodni milliy va jahon musiqa san’atining yuksak namunalaridan bahramand etish, ularning iste’dodini kamol toptirish va har tomonlama qo‘llab-quvvatlash, opera san’atini yoshlar o‘rtasida keng ommalashtirishdan iboratdir.

Yoshlar yig‘ma simfonik orkestri hamda opera ijrochilari tarkibida nufuzli xalqaro tanlovlar sovrindorlari ko‘p. Rahim Mirzakamolov, Ramz Usmonov, Jenisbek Piyazov, Jabroil Idrisov, Ma’suma Boltaboyeva, Barno Ismatullayeva, Shirin Mamatova, Milena Matmusayeva kabi iste’dodli opera ijrochilari bilan birga, Tohir Usmonov, Alirna Qoriyeva, Bobur Muhammadjonov, Davron Hoshimov singari yosh musiqachilar Fransiya, Italiya, Avstriya, Ruminiya, Belarus, Qozog‘iston va boshqa mamlakatlarda o‘tkazilgan xalqaro tanlovlar, ijodiy festivallarda muvaffaqiyat qozongan. Bu yoshlar xalqimizning umidli yulduzlaridir. Ayni paytda ularning ijrosi, erishgan ijodiy yutuqlari mustaqillik yillarida yurtimizda san’at rivojiga ko‘rsatilayotgan e’tibor va g‘amxo‘rlikning nechog‘li yuksakligidan darak beradi.

Jahon va o‘zbek kompozitorlari ijodidan eng sara namunalar, mashhur operalardan ariyalar, kuy-qo‘shiqlarni tomoshabinlar hayajon va zavq bilan kutib oldi. Jorj Bizening “Toreodor qo‘shig‘i”, Leo Delibning “Gullar dueti”, Karl Orfning “Omad”, Tomazo Albionining “Adajio” kabi mashhur asarlari bilan birga, Manas Leviyevning “O‘rik gullaganda”, “Oq lolalar” qo‘shiqlari, Sulaymon Yudakovning “Maysaraning ishi” operasidan Hoji darg‘a ariyasi tomoshabinlarda unutilmas taassurot uyg‘otdi. Musiqa mazmuniga uyg‘un tarzda sahnadagi ulkan monitor orqali namoyish etilayotgan lavhalar asar mohiyatini, uning falsafasi va ta’sirchanligini yanada yaqqolroq anglashga xizmat qiladi. Ko‘klamning jozibasi va go‘zalligi musiqaning sehrli va maftunkor ohanglari vositasida chinakam bahor simfoniyasi tarzida sahnaga ko‘chganini har bir tomoshabin dildan his etdi.

– O‘zbekiston betakror san’ati va madaniyati bilan har qanday insonni o‘ziga maftun etadi, – deydi Buyuk Britaniyaning “Earth Times” onlayn jurnali muharriri Devid Armstrong. – Bunday muhtasham saroyda iste’dodli yosh opera ijrochilari ishtirokidagi konsert bizda katta taassurot uyg‘otdi. O‘zbekiston yoshlarining jahonga mashhur kompozitorlar asarlarini yuksak mahorat bilan ijro etishi tahsinga loyiq.

– Mamlakatimizda iste’dod sohiblariga ko‘rsatilayotgan e’tibor bizni yanada yuksak marralarga undaydi, – deydi «Nihol» mukofoti sovrindori Jenisbek Piyazov. – Ko‘pgina xalqaro tanlovlarda ishtirok etgan bo‘lsam-da, jonajon O‘zbekistonimizdagi shunday mahobatli saroyda kuylash biz uchun sharaf hamda ulkan mas’uliyatdir.

– Mamlakatimizda yoshlarga ko‘rsatilayotgan ulkan g‘amxo‘rlik yuksak marralar sari intilishimizda muhim omil bo‘lmoqda, – deydi Toshkent avtomobil-yo‘llar instituti talabasi Oyshabonu Anvarova. – Konsertda san’atkor tengdoshlarimizning mahoratidan hayratga tushdik. Bu konsert mamlakatimiz navqiron avlodi hech kimdan kam bo‘lmay voyaga yetayotganini yana bir bor namoyon etdi.

Konsertda jahon va o‘zbek opera san’atining eng sara namunalari ijro etildi.

www.uza.uz