Барқарор ривожланиш мақсадлари “Ўзбекистон – 2030” стратегияси билан ўзаро боғлиқликда амалга оширилади

Маълумки, 2030 йилгача БМТ нинг Глобал кун тартибидаги Барқарор ривожланиш мақсадларини изчил амалга ошириш бўйича тизимли ишлар олиб борилмоқда. Шу мақсадда Ўзбекистон Республикаси Вазирлар Маҳкамаси томонидан 2030 йилгача 16 та Барқарор ривожланиш миллий мақсадлари ҳамда улар билан боғлиқ бўлган 125 та вазифа тасдиқланган.

Айнан шу вазифаларга асосан 2017-2022 йиллардаСоғлом турмуш тарзини таъминлаш ва барча ёшдаги инсонларнинг фаровонлигига кўмаклашиш бўйича қандай ишлар бажарилди?

Макроиқтисодий ва ҳудудий тадқиқотлар институтининг катта илмий ходими Абдуллатифхон Анвархонов ушбу саволга қуйидагича жавоб берди:

–Очиғини айтиш керракки, бизнинг илмий муассаса фаолияти мамлакатимизда олиб борилаётган ислоҳотлар ва ўзгаришларни таҳлил қилиб, барча соҳалар бўйича тегишли таклифлар ишлаб чиқишга қаратилган.

Саволингизга келсак, Бирлашган Миллатлар Ташкилотининг Барқарор ривожланиш мақсадларидан бири – мамлакатимизда соғлом турмуш тарзини таъминлаш ва барча ёшдаги инсонларнинг фаровонлигига кўмаклашишдир. Айнан бу борада ишлар жадал олиб борилмоқда. Натижалар қандай бўлди деган савол туғилиши табиий.

Шу мақсадда илмий муассасамиз мутахассислари Ўзбекистон 2017-2022 йилларда бу борада амалга оширилган ишларнинг натижаларини таҳлил қилиб чиқди. Айтиш жоизки, “Соғлом турмуш тарзини таъминлаш ва барча ёшдаги инсонларнинг фаровонлигига кўмаклашиш” 16 та миллий мақсаднинг учинчиси бўлиб, у 13 та вазифа ҳамда 23 та кўрсаткичдан иборатдир.

Бунда асосий кўрсаткичлар бўйича юқори натижаларга эришилган. Унга кўра, оналар ўлими коэффициенти тирик туғилган ҳар 100 000 чақалоққа 2017 йилда 21,0 коэффициентини ташкил этган бўлса, 2022йилда 13,9 коэффициентини ташкил қилган. Ушбу кўрсаткич 5 йил давомида 51,0 фоизга яхшиланган.

Сил касаллиги билан касалланиш ҳолатлари ҳар 100 000 кишига 2017-2022 йилларда 44,9 коэффициентидан 35,3 коэффициентигача камайди ва 27,0 фоизга яхшиланди. Гепатит “Б” билан касалланиш ҳолатлари 2017 йилда ҳар 100 000 кишига 0,8 коэффициентини ташкил қилган бўлса, 2022 йилда 0,4 коэффициентини ташкил этди ва икки баробар камайди.

Ўз жонига қасд қилиш билан боғлиқ ўлим коэффициенти 2017йилда ҳар 100 000 кишига 7,5 коэффициентини ташкил этган эди. Бу кўрсаткич 2022 йилда 4,5 коэффициентигача пасайиб, 66,7 фоизга яхшиланди.

Ҳар 10 000 кишига тўғри келадиган тиббиёт ходимлари сони 2017 йилда 26,1 коэффициентини ташкил қилган бўлса, 2022 йилда 27,9 коэффициентига ошди ва 6,9 фоизга ижобий ўзгариш қайд этилди.

Албатта, юқорида келтирилган рақамлар аҳолининг соғлом турмуш тарзида ижобий ўзгаришлар бўлаётгани билан боғлиқдир. Бунда кўрсаткичларни таққосий ўрганиш ҳар жиҳатдан фойдалидир.

Ўз навбатида, келгусида БРМ нинг 3-мақсадини “Ўзбекистон – 2030” стратегияси билан ўзаро боғланган ҳолда амалга ошириш кўзда тутилган. Бунда аёллар, гўдаклар ва беш ёшгача бўлган болалар орасида ўлим билан боғлиқ ҳолатларни 2 баробар камайтириш, туғруқ ўринлари сонини 35 фоиз ошириш, болалар орасида юқумли ва юқумли бўлмаган касалликларни 20 фоизга қисқартириш. онкологик касаллиги бор 120 минг нафар беморни даволаш билан тўлиқ қамраб олиш каби мақсадли параметрларга эришиш сари дадил қадам ташланади.

ЎзА