BOBUR MEROSI “BALTIC NEWS SERVICE” NIGOHIDA

“Baltic News Service” - Boltiqbo’yi axborot xizmati agentligi o’z veb-sahifasida ulug’ shoir va davlat arbobi Zahiriddin Muhammad Bobur tavalludining 533 yilligiga bag’ishlangan maqolani o’z o’quvchilarining e’tiboriga havola qildi.

Agentlik Boburning hayoti va ijodi haqida atroflicha hikoya qilgan. “Bobur asarlari odamlarning dini, millati va yoshi qandayligidan qat’iy nazar ularning barchasini yaxshilikka da’vat etadi. Uning ko’plab asarlari o’nlab boshqa xalqlar tillariga tarjima qilinmoqda. Bobur o’zidan bebaho ilmiy merosni ham qoldirgan. U12 yoshida Farg’ona hukmdori, 1526 yilda esa uch asrdan ko’proq yashagan markazlashgan Hindiston davlatini barpo etgan. O’z hukmronligi davrida ko’plab samarali islohotlarni amalga oshirdi. Jumladan, Agra, Dehli singari shaharlarni barpo etdi, Jamna daryosi qirg’oqlarida saroylar barpo etdi, soliqlarni qisqartirdi, suv ta’minoti tizimini takomillashtirdi”, deb yozadi agentlik.

Ma’lumki, dunyo olimlarining e’tirof etishlaricha, jahon tarixida insonparvarligi, ilmi va dunyoqarashi kengligi jihatidan Boburga tenglasha oladigan hukmdorlar sanoqlidir. Uning merosi o’sib kelayotgan yosh avlodni tarbiyalashda muhim ahamiyat kasb etadi.

“O’zbek va dunyo olimlari olib borgan ilmiy-amaliy tadqiqotlar natijasida buyuk ma’rifatparvarning ko’plab ijod namunalaridan olingan nusxalar O’zbekistonga keltirildi, “Boburnoma asariga miniatyuralar” albomi, shoh va shoirning “Aruz haqida qaydlar” kitobi va yana boshqa ko’plab asarlari nashr qilindi”. Maqolaning xulosa qismida O’zbekistonning mustaqillikka erishgani Zahiriddin Muhammad Bobur merosini chuqur o’rganish va ular dunyo merosi qatoridan joy olishida katta ahamiyat kasb etgani alohida ta’kidlanadi.

“Jahon” AA, Riga