BUXORODA SAYLOV QONUNCHILIGIGA BAG‘ISHLANGAN DAVRA SUHBATI O‘TKAZILDI

Jinoyat ishlari bo‘yicha Buxoro viloyati sudida “O‘zbekiston Respublikasi Prezidenti saylovi: tashkiliy-huquqiy asoslar” mavzusida davra suhbati bo‘lib o‘tdi.

Tadbirda viloyat prokuraturasi, ichki ishlar boshqarmasi vakillari, fuqarolik va jinoyat ishlari bo‘yicha viloyat, tumanlararo, tuman (shahar) sudlari hamda viloyat harbiy sudi sudyalari va xodimlari ishtirok etdi.

Jinoyat ishlari bo‘yicha viloyat sudi raisi I.Muslimov, Fuqarolik jamiyati shakllanishini monitoring qilish mustaqil instituti viloyat hududiy bo‘linmasi rahbari J.Boltayev va boshqalar mamlakatimizda mustahkam milliy qonunchilik bazasi yaratilgani fuqarolarning o‘z xohish-irodasini emin-erkin ifoda etishida muhim omil bo‘layotganini ta’kidladi.

– Saylov to‘g‘risidagi qonun hujjatlariga muvofiq, saylov jarayoni qonuniy, adolatli o‘tishi, saylovning barcha ishtirokchilariga teng sharoitlar yaratishda saylov komissiyalari zimmasiga katta mas’uliyat yuklatiladi, – deydi Jinoyat ishlari bo‘yicha Buxoro viloyati sudi sudyasi A.Saidov. – Ular o‘z vakolati doirasida mustaqildirlar. Komissiyalar ishiga aralashuv taqiqlanadi.

Markaziy saylov komissiyasining o‘z vakolatlari doirasida qabul qilgan qarorlari quyi saylov komissiyalari, tegishli mahalliy davlat organlari, siyosiy partiyalar va boshqa jamoat birlashmalari, mehnat jamoalari hamda harbiy qismlar, muassasa va tashkilotlarning rahbarlari uchun majburiyligi, saylov komissiyalarining murojaatlarini ko‘rib chiqishni g‘ayrihuquqiy ravishda rad etish, ularni ko‘rib chiqish muddatlarini uzrli sabablarsiz buzishning huquqiy oqibatlari haqida so‘z yuritildi.

Tadbirda fuqarolik ishlari bo‘yicha sudlarda saylov komissiyasining xatti-harakatlari va qarorlari ustidan berilgan shikoyatlarni ko‘rib chiqish tartibi to‘g‘risidagi masala xususida ham fikr almashildi.

O’zA