BUYUK DAVLAT ARBOBI VA MUMTOZ SHOIR

O’zbekiston “Milliy tiklanish” demokratik partiyasi markaziy kengashi ijroiya qo’mitasi partiyaning Oliy Majlis Qonunchilik palatasidagi fraksiyasi va Temuriylar tarixi davlat muzeyi bilan hamkorlikda Zahiriddin Muhammad Bobur tavalludining 533 yilligiga bag’ishlab davra suhbati tashkil etdi, deb xabar beradi O’zbekiston Milliy axborot agentligi .

Temuriylar tarixi davlat muzeyi direktori X.Fayziyev, O’zbekiston “Milliy tiklanish” demokratik partiyasi markaziy kengashi raisi o’rinbosari J.Safoyev va boshqalar Prezidentimiz Islom Karimov rahnamoligida buyuk ajdodlarimiz xotirasini abadiylashtirishga, jumladan, Boburning benazir shaxsi, betakror ijodini chuqur o’rganish va keng targ’ib qilishga alohida e’tibor qaratilayotganini ta’kidladi.

Mamlakatimizning qator shaharlarida Bobur nomidagi ko’rkam bog’lar barpo etilgan. Andijonda “Bobur va jahon madaniyati” kitob muzeyi tashkil qilingan.

Boburning ma’naviy merosi asrlar osha milliy madaniyatimizni yuksaltirishga xizmat qilib kelmoqda. Shoirning boy merosida davlat va uni boshqarish, davlatning asosiy vazifasi, fuqarolarning burch va majburiyatlari, odil sudlov va xalqlarning etnografiyasi chuqur tahlil etilgan.

Bobur insonni eng oliy qadriyat deb bilgan. Shu bois uning ijodi nafaqat mamlakatimizda, balki butun dunyo xalqlari tomonidan sevib o’qiladi. “Boburnoma” asari o’ttizdan ortiq tilga tarjima qilingani buning dalilidir.

— Ulug’ ajdodimizning ma’naviy merosiga juda qiziqaman, - deydi Toshkent davlat yuridik universiteti talabasi Adolat Hojiyeva. - Shoir asarlarida real hayot tasviri, kundalik voqyealar bayoni, shaxsiy kechinmalar tasviriga keng o’rin beriladi. Vatan sog’inchiyu g’urbat g’ami, zafarlar quvonchiyu mag’lubiyatlar alami o’zining yorqin badiiy ifodasini topgan. Bobur “Bori elga yaxshilik qilg’ilki, mundin yaxshi yo’q, Kim, degaylar dahr aro qoldi falondin yaxshilig’!” der ekan, jahonda faqat yaxshilik poydorligiga, odam bolasidan faqat yaxshilik qolishiga ishonadi. Buyuk bobomiz shaxsi va ijodini chuqur o’rganishimiz qalbimizda Vatanga muhabbat, insonparvarlik kabi azaliy ezgu g’oyalarning mustahkam qaror topishiga xizmat qiladi.

Tadbirda Zahiriddin Muhammad Bobur ijodidan namunalar o’qildi. Temuriylar tarixi davlat muzeyiga ekskursiya uyushtirildi.

Jahon AA