BUYUKLIKKA DAXLDORLIK TUYG’USI

Italiyada chop etiladigan “Acqua & Sapone” ommabop jurnalining aprel oyi sonida taniqli fotomuxbir Roberto Gabriyelning Samarqand shahriga bag’ishlangan maqolasi e’lon qilindi.

Afsonaviy Samarqandning go’zalligiga maftun bo’lgan maqola muallifi uning dunyodagi eng qadimiy shaharlardan biri hamda Bobil va Rimning tengdoshi ekanini, Buyuk Ipak yo’lida joylashgan ushbu betakror go’sha Amir Temur davlatining poytaxti bo’lganini ta’kidlaydi.

“Samarqand - bu nafaqat italiyalik xonanda Roberto Vekkioni kuylagan mashhur qo’shiqning, balki O’zbekistonning eng jozibali maskanlaridan birining, o’zining bunyod bo’lgan paytidagi go’zal qiyofasini saqlab qololgan, jo’shqin hayotga limmo-lim sayyohlik shahrining nomidir, - deya izohlaydi R.Gabriyel. - Bu yerda qadimiy milliy rang-baranglikni zamonaviy uslublar bilan uyg’un ko’rinishlaridan bahra olish mumkin”.

Muallifning fikriga ko’ra, har kim uchun Samarqandni bir bor ko’rish go’yo tushida kechgan yoki uzoq kutilgan orzusiga erishish bilan barobardir. “Kun bоtar payti qo’yoshning so’nggi nurlari ostidagi Registon maydoni odamga buyuklik va ilohiylikka daxldorlik tuyg’usini ulashadi”, deb yozadi hayrat bilan italiyalik muxbir.

“Buyuk Ipak yo’li yo’nalishi bo’ylab borarkansiz, o’tmishdagi sayohatchilarning nimalarni his etishganini tuyushingiz mumkin: bu yo’llar yuz yilliklarni viqor to’kib turgan beqiyos masjidlari va minoralari, asr davomida karvonlarni o’ziga jalb etib kelgan va bugungi kunda ham mavjud bo’lgan qo’li gul hunarmandlarning do’konlari bilan qarshi olgan, - deyiladi “Acqua & Sapone” jurnalining maqolasida. - Ipak yo’li tarixiy va madaniy ahamiyatiga ko’ra sayyohlarning xotiralari va zehniyatida hozir ham qadimgi vaqtlardagidek ulug’vorlik kasb etadi”.

“Jahon” AA, Rim