EURONEWS TELEKANALIDA POI KALON ME’MORIY MAJMUI

Yangi 2017-yilning ilk kunlaridan Yevropaning bosh axborot telekanali mamlakatimizning tarixiy obidalari va sayyohlikka oid diqqatga sazovor joylari bilan tanishtirishga bag’ishlangan dasturlarni efirga uzata boshladi.

Euronews telekanalining “Postcards from Uzbekistan” turkumidan o’rin olgan navbatdagi - “Mahobatli Poi Kalon majmui etagida” nomli Buxoro shahrida joylashgan ushbu me’moriy yodgorlikka bag’ishlangan ko’rsatuv efirga uzatildi.

Unda mazkur majmua mamlakat uchun juda qadrli bo’lib, o’zida yuzlab yillar oldin barpo etilgan islom me’morchiligining durdonalarini mujassam etgani ta’kidlanadi. Telekanal sharhlovchisi Poi Kalon XII va XVI asrlarda qurilgan uchta asosiy inshoot - minora, madrasa va masjiddan iborat ekani haqida hikoya qiladi.

Minorai Kalon Markaziy Osiyodagi eng qadimiy me’moriy yodgorliklardan biri hisoblanishi haqida so’z yuritilarkan, ko’rsatuvda Poi Kalon majmuining nomlanishi “Katta minoraning etagi” deya tarjima qilinishi tushuntiriladi.

Sharhlovchi Sheymus Kerni muazzam Minorai Kalonning tepa qismidagi darchasida turib ushbu me’moriy obidaning balandligi qariyb 47 metrni tashkil etishi, uning ustidan Buxoroni tomosha qilish mumkinligi va qadimda undan shaharga kelishi mumkin bo’lgan xavfdan qo’riqlovchi minora sifatida ham foydalanilganligi haqida hikoya qiladi.

Dasturda majmuaning ichki hovlisini o’rab turgan madrasaning devorlari rang-barang qadama va manzarali naqshlar bilan bezatilgani qayd etiladi.

Ko’rsatuvning o’ziga jalb etadigan asosiy jihati shundaki, unda Buxoroi sharifning eng qadimiy mahobatli tarixiy obidalarining qush parvozi balandligidan tushirilgan tasviri efirga uzatiladi.

“Jahon” AA, Parij