Farg‘ona va Leningrad aloqalari yanada mustahkamlanmoqda

Joriy yilning 14–16 sentabr kunlari Farg‘ona jurnalistlar uyushmasi rahbari Muhammadjon Obidov va Farg‘ona viloyati Slovyan milliy markazi rahbari Galina Akopdjanova boshchiligidagi delegatsiya Farg‘ona va Leningrad viloyatlarining madaniy-ma’rifiy sohalardagi ikki tomonlama aloqalarini yanada mustahkamlash maqsadida Sankt-Peterburg shahrida bo‘ldi.

Tashrif doirasida viloyat ma’muriyati rahbarlari, ilmiy-madaniy markaz va keng jamoatchilik vakillari, shuningdek, ushbu shaharda istiqomat qilayotgan va tahsil olayotgan o‘zbekistonlik yoshlar bilan uchrashuvlar o‘tkazildi.

Tadbirda so‘zga chiqqan Leningrad viloyati o‘zini-o‘zi boshqarish millatlararo munosabatlar qo‘mitasi raisi L.Burak, Leningrad viloyati “Do‘stlik uyi” direktori V.Mixaylenko, Farg‘ona viloyati Slovyan milliy markazi rahbari G.Akopdjanova va boshqalar O‘zbekistonda yuz berayotgan ijtimoiy-iqtisodiy hamda siyosiy o‘zgarishlarni alohida ta’kidlar ekan, bugungi kunda ikki mamlakat xalqlari o‘rtasidagi do‘stlik rishtalarini yanada mustahkamlash uchun qulay imkoniyatlar yaratilayotganini qayd etdilar.

V.Mixaylenko va G.Akopdjanovalar ikki viloyat o‘rtasida uzoq muddatli o‘zaro milliy ansambl safarlarini tashkil etish, ta’lim sohasida tajriba almashuvini yo‘lga qo‘yishga oid qator hamkorlik shartnomalarini imzoladilar.

Ta’kidlash joizki, safar doirasida, shuningdek, Farg‘ona viloyati vakillari Leningradning Priozersk shahrida har yili an’anaviy tarzda o‘tkazib kelinadigan “Rossiya ohanglari” 5-etnomadaniyat festivalida ham ishtirok etishdi. Qariyb 50 ta milliy madaniyat markazi ishtirok etgan mazkur festival chog‘ida o‘zbek milliy liboslari, cholg‘u asboblari, xunarmandchilik namunalari, tasviriy san’at buyumlari mehmonlar e’tiboriga havola qilindi.

“Dunyo” AA, Sankt-Peterburg