FARG‘ONA VILOYATIDA 75 MINGGA YAQIN YOSH SAYLOVDA BIRINCHI MARTA OVOZ BERADI

Joriy yil 4-dekabr kuni bo‘lib o‘tadigan O‘zbekiston Respublikasi Prezidenti saylovida Farg‘ona viloyatida 75 mingga yaqin yoshlar birinchi marta ovoz beradi.

O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturiga ko‘ra, uyushqoqlik bilan olib borilayotgan saylov kampaniyasi tufayli fuqarolarning huquqiy-siyosiy bilimi, ijtimoiy faolligi ortmoqda. Ular saylovda ishtirok etish orqali o‘z fuqarolik pozitsiyasini, yurt kelajagi uchun o‘z hissasini qo‘shish imkoniyatiga ega ekanini teran anglab yetmoqda. Buni shu kunlarda mamlakatimizdagi akademik litsey, kasb-hunar kolleji va oliy ta’lim muassasalarida o‘tkazilayotgan siyosiy-huquqiy, ma’naviy-ma’rifiy targ‘ibоt tadbirlari misolida ham ko‘rish mumkin.

Yoshlar mamlakatimizda amalga oshirilayotgan keng ko‘lamli islohotlar, demokratik o‘zgarish va yangilanishlarning bevosita ishtirokchisi hisoblanadi. Bu esa ularning saylov qonunchiligiga doir bilim va tushunchalarini yanada boyitishni, huquqiy madaniyatini yuksaltirishni taqozo etadi. Shu maqsadda Farg‘ona viloyatidagi barcha oliy o‘quv yurtlari, o‘rta maxsus, kasb-hunar ta’limi muassasalarida saylovda ilk bor qatnashadigan yoshlar ishtirokida turli tadbirlar o‘tkazilmoqda. "Bugun o‘quvchi – ertaga saylovchi", "Sening ovozing hal qiluvchi ahamiyatga ega", "Men birinchi marta ovoz beraman!", “Bir saylovchi – bir ovoz” shiorlari ostidagi tarqatma materiallar, joylarda o‘rnatilgan targ‘ibоt bannerlari navqiron avlodni saylov qonunchiligi bilan yaqindan tanishtirish barobarida ularning huquqiy madaniyatini yanada yuksaltirishga xizmat qilmoqda.

Tadbirlarda mutaxassislar “O‘zbekiston Respublikasi Prezidenti saylovi to‘g‘risida”, “O‘zbekiston Respublikasi Markaziy saylov komissiyasi to‘g‘risida”, “Fuqarolar saylov huquqlarining kafolatlari to‘g‘risida”gi qonunlar va saylovga oid boshqa qonunchilik hujjatlarining mazmun-mohiyati haqida keng tushunchalar bermoqda.

– Kollejimizda Bosh qomusimizning hayotimizdagi o‘rni, mamlakatimizda demokratik tamoyillar asosida o‘tkazilayotgan saylovlar mohiyati, ularda yoshlarning ishtirokiga bag‘ishlangan tadbirlar tashkil etilmoqda, – deydi Buvayda agrosanoat kasb-hunar kolleji o‘quvchisi Adham Turobjonov. – Bu yil ilk bor saylovda ovoz beraman. Bu men uchun ham hayajonli, ham mas’uliyatli. Zero, fuqarolik burchimni ado etishim mamlakatimiz taraqqiyoti, hayotimiz farovonligiga o‘z hissamni qo‘shishning yana bir imkoniyatidir.

O’zA