FAROVON TURMUSH KAFOLATI

O‘zbekiston Respublikasi Konstitutsiyasi qabul qilinganining 23-yilligi oldidan Farg‘ona viloyatida ham turli madaniy-ma’rifiy tadbirlar, uchrashuv va davra suhbatlari o‘tkazilmoqda.

Ahmad Farg‘oniy nomidagi viloyat axborot-kutubxona markazida bo‘lib o‘tgan shunday tadbir “O‘zbekiston Respublikasi Konstitutsiyasi – mamlakatimizda amalga oshirilayotgan islohotlarning huquqiy asoslari” deb nomlandi. Unda davlat va jamoat tashkilotlari, huquq-tartibot idoralari, ta’lim muassasalari xodimlari, mahalla faollari, yoshlar ishtirok etdi.

O‘zbekiston Respublikasi Konstitutsiyaviy sudi sudyasi U.Bozorov va boshqalar Prezidentimiz rahnamoligida huquqiy-demokratik davlat va kuchli fuqarolik jamiyati barpo etish yo‘lida keng ko‘lamli islohotlar amalga oshirilayotganini alohida ta’kidladi. Bosh qomusimizda belgilangan kafolatlar ozod va obod Vatan, tinch-osuda va farovon hayot barpo etishda huquqiy asos bo‘lib xizmat qilayotir.

Asosiy qonunimizning qabul qilinishi mustaqilligimizga mustahkam huquqiy poydevor qo‘yib, jamiyatimizning ishonchli huquqiy kafolatlarini belgilab berdi. Konstitutsiyamizning g‘oya va normalarida xalqimizning ko‘p asrlik ma’naviy qadriyatlari, boy tarixiy-huquqiy merosi aks ettirilgani, shuningdek, u umuminsoniy qadriyatlarni, xalqaro andozalarni o‘zida mujassam etgani bilan ham ahamiyatlidir.

– Bosh qomusimizning mazmun-mohiyatini o‘rganish biz, yoshlar uchun muhim ahamiyatga ega, – deydi Farg‘ona davlat universiteti talabasi Tabassum Mo‘minova. – Chunki unda barcha huquq va burchlarimiz belgilab berilgan.

O‘zA