FAXRIYLAR MAMNUN

Poytaxtimizdagi Urush va mehnat faxriylari respublika pansionatida mehr-muruvvat aksiyasi o’tkazildi.

9 may — Xotira va Qadrlash kuni munosabati bilan tashkil etilgan ushbu tadbirda mo’’tabar insonlarni ijtimoiy muhofaza qilish, salomatligini mustahkamlash hamda ularga munosib turmush sharoiti yaratish davlatimiz siyosatining ustuvor yo’nalishlaridan biri ekanligi ta’kidlandi.

Ayni paytda ushbu muassasada 135 nafar nuroniy istiqomat qilmoqda. Ular uchun barcha qulaylik yaratilgan. Otaxonu onaxonlarni klinikalar hamda sanatoriylarda sog’lomlashtirishga alohida e’tibor qaratilmoqda. Har bir xonada televizor, muzlatkich, mebellar mavjud. Shuningdek, pansionatning 3,2 gektarlik hududida voleybol, minifutbol, tennis maydonlari bor. Istiqomat qiluvchilar bir qator madaniy-ma’rifiy tadbirlar, kino va teatr tomoshalariga olib boriladi. Homiylar ko’magida Toshkentning diqqatga sazovor joylari hamda mamlakatimizning tarixiy shaharlari, jumladan, Samarqand, Buxoro, Shahrisabz, Xivaga uyushtirilayotgan sayohatlar ham keksalarga manzur bo’lmoqda.

Aksiya doirasida nuroniylar chuqurlashtirilgan tibbiy tekshiruvdan o’tkazildi. Turli tashkilot va korxonalar tomonidan ularga zarur iste’mol tovarlari hamda qim-matbaho sovg’alar topshirildi.

"Jahon" AA