"Finančné Noviny" газетаси: Термиз азалдан Марказий ва Жанубий Осиё минтақалари ўртасидаги боғловчи нуқта бўлиб келган

Словакиянинг нуфузли "Finančné Noviny" газетасида "Марказий ва Жанубий Осиё: унутилган боғлиқликни тиклаш сари қадамлар" сарлавҳали мақола чоп этилди, деб хабар қилмоқда "Дунё" АА мухбири.

Мақола 19-21 май кунлари Термиз шаҳрида бўлиб ўтаётган "Тинчлик, дўстлик ва фаровонликнинг умумий маконини барпо этиш" мавзусидаги Марказий ва Жанубий Осиё ўртасидаги ўзаро ҳамкорлик бўйича Термиз мулоқотининг биринчи йиғилишига бағишланган.

Қайд этилганидек, ушбу учрашувда дунё сиёсатининг диққат марказига айланиб бораётган Марказий ва Жанубий Осиё мамлакатлари ташқи сиёсий идора вакиллари билан бирга БМТнинг ихтисослашган ташкилотлари, МДҲ, ШҲТ, Осиёда ҳамкорлик ва ишонч чоралари бўйича кенгаши (ОҲИЧК) ҳамда соҳалар бўйича етук мутахассислар ҳамда экспертлар иштирок этмоқда.

"Марказий ва Жанубий Осиё азалдан ишончли савдо йўллари орқали боғланган, Яқин Шарқ, Европа ва Хитой мамлакатлари учун кўприк вазифасини ўтаган, – дейилган нашрда. – Ушбу ҳудуддаги халқлар тарихий ва цивилизациявий умумийликка эга бўлиб, ўтмишда улар умумий давлат тузилмалари, шунингдек, ягона сиёсий, иқтисодий ва гуманитар макон бўлиб келган. Икки минтақа ўртасидаги алоқалар кўп асрлар давомида кўплаб миграция оқимлари, жадал савдо алмашинувлари, илмий ғояларнинг тез тарқалиши ва маданий ўзаро таъсир билан мустаҳкамланган".

Бугунги кунга келиб эса минтақадаги тинчлик ва барқарорликка таҳдид солаётган мавжуд муаммоларни биргаликда ҳал қилиш мамлакатларининг ижтимоий, маданий ва иқтисодий ривожи учун муҳим омиллардан биридир. Шу сабабли уларнинг бир-бирлари билан тарихий яқин алоқаларини қайта йўлга қўйишнинг долзарблиги ортиб бормоқда. Юқоридагиларни инобатга олган ҳолда Марказий ва Жанубий Осиё ўртасидаги ўзаро боғлиқлик бўйича Термиз мулоқоти ташкил этилмоқда.

"Мулоқот учун танланган жой бу шаҳарнинг геостратегик жойлашуви, Марказий ва Жанубий Осиё чорраҳасида, яъни минтақалараро ўзаро боғлиқликнинг йўллари кесишган нуқтада жойлашганлиги билан боғлиқ. Хусусан, Термиз азалдан савдо, иқтисодиёт, ҳунармандчиликнинг жозибадор маркази, Марказий ва Жанубий Осиёнинг улкан минтақалари ўртасидаги боғловчи нуқта бўлиб келган. Шу сабабдан шаҳарни геосиёсий нуқтаи назардан Марказий ва Жанубий Осиёни боғловчи "табиий кўприк", тарихий жойлашуви ва маданий мероси орқали минтақа халқларини яқинлаштириш учун энг мақбул маскан, деб ҳисоблаш ўринлидир", – деб таъкидланган материалда.

Маълум қилинганидек, ҳозирги кунда Марказий ва Жанубий Осиё мамлакатлари глобал аҳамиятга эга ҳудуд бўлиб, аҳолиси 2 миллиарддан ортиқ ва улкан таълим салоҳиятига эга. Минтақада демографик ўсиш юқори, аҳолининг катта қисми ёшлардан иборат бўлиб, интеллектуал салоҳиятни рўёбга чиқариш учун улкан имкониятлар мавжуд.

Қайд этилишича, Марказий ва Жанубий Осиё ўртасида рақамли ўзаро боғлиқлик бўйича қўшма стратегияни ишлаб чиқиш муҳим аҳамият касб этади. Ушбу ҳужжатни қабул қилиш савдо ва инвестицияларни рағбатлантириш, таълим ва соғлиқни сақлаш соҳаларига етиш имкониятини яхшилаш, минтақавий ҳамкорликни мустаҳкамлаш ҳамда жаҳон майдонида рақобатбардошликни ошириш учун катта имкониятлар яратади.

"Марказий ва Жанубий Осиё мамлакатларининг рақамли иқтисодиётни кенг жорий этиш борасидаги саъй-ҳаракатларини мувофиқлаштириш ҳаётнинг барча соҳаларида рақамлилаштириш жараёнларини такомиллаштиришга хизмат қилади. Бундан ташқари, бу аҳоли учун Интернетга хавфсиз кириш имконини таъминлашга қаратилган БМТнинг Барқарор ривожланиш мақсадларини амалга оширишни илгари суриб, таълим ва тиббий хизматлардан фойдаланиш имкониятларини кенгайтиришга йўл очади", – деб ёзилган "Finančné Noviny" газетасида босилган мақола.