“GrenzEcho”: Ўзбекистонда ўзимизни яхши ҳис этаяпмиз

Бельгиянинг немис тилидаги “GrenzEcho” (“Чегара ҳудуди садоси”) газетаси интернет саҳифаси ўз ўқувчиларининг Ўзбекистонда давом этаётган саёҳати борасида мақола чоп этди, деб хабар бермоқда “Дунё” АА мухбири.

“33 нафардан иборат “GrenzEcho” ўқувчиларининг Ўзбекистондаги саёҳатлари 19 мартгача давом этади. Улар бу ерда ўзларини жуда яхши ҳис этмоқда. Айни пайтда сайёҳлар Марказий Осиёнинг гавҳари ҳисобланмиш гўзал Самарқанд шаҳрида бўлиб турибди. Шу кунларда Ўзбекистон ҳам вирус инфекцияси тарқалмаслиги олдини олиш учун қатор чора-тадбирларни аллақачон бошлаб юборди”, - деб ёзади “GrenzEcho” интернет нашри.

“Коронавирус мамлакатга Францияга чанғи спорти билан шуғуллангани борган ўзбекистонлик фуқаро томонидан олиб келинган. Вирусдан ҳимоя қилиш мақсадида бельгиялик туристларга ҳам ҳимоя ниқоби тарқатилди. Экскурсовод тез-тез ҳар соатда мамлакат Ташқи ишлар вазирлигидан вирусга оид янги маълумотлар олиб турибди. Олинган маълумотларда мамлакатда қанча сайёҳ борлиги ва улар имкон қадар тезда соғ-саломат ўз юртларига қайтариш лозимлиги тўғрисида сўз юритилади. Шунингдек, биз Бельгиянинг Москвадаги элчихонаси ва Тошкентдаги консуллиги билан доимий алоқадамиз”, - дея таъкидлайди Бельгиянинг немис тилида чоп этиладиган газетаси.

“Сиз кўриб турган ушбу Самарқанднинг таниқли Регистон майдонида тушилган сурат биз бу ерда ўзимизни яхши ҳис этаётганимиздан дарак беради, - деб якунланган “GrenzEcho” мақоласи.

Маълумот ўрнида шуни айтиш керакки, 1927 йилда ўз фаолиятини бошлаган «GrenzEcho» газетаси Бельгиянинг Германия билан туташган чегара ҳудудида жойлашган Эйпен шаҳрида чоп этиладиган немис тилидаги ягона газетадир.

UzA