GRETSIYADA O’ZBEKISTONNING BOY MADANIY-TARIXIY MEROSI NAMOYISH ETILDI

Afinadagi mashhur galereyalardan biri - S.G. Gallery saroyida o’zbek xalqining boy merosiga bag’ishlangan suratlar ko’rgazmasi bo’lib o’tdi. Tadbir Marakanda Expedition sayyohlik kompaniyasi tomonidan mamlakatimizning Afinadagi bosh konsulxonasi hamda Gretsiya-O’zbekiston madaniyat va ishbilarmonlik hamkorligi markazi ko’magida tashkil etildi.

Bir hafta davom etgan ko’rgazmada tashrif buyuruvchilar O’zbekistonning qadimiy va o’ziga xos madaniyati bilan tanishish imkoniyatiga bo’lishdi. Unda 15 nafar gretsiyalik musavvir va haykaltaroshning asarlari hamda xususiy kolleksiyachi arxivida saqlanib kelayotgan amerikalik mo’yqalam sohibi Endi Uorxol tomonidan ishlangan suratlar namoyish etildi.

O’zbekistonning tarixiy shaharlari - Samarqand, Buxoro va Xivaning ko’rinishlari, me’moriy inshootlar, madaniy obidalar va boshqa qadimiy yodgorliklar aks ettirilgan rangtasvir asarlari ko’rgazma mehmonlarida katta qiziqish uyg’otdi.

Suratlar muallifi musavvir Yanis Kadras O’zbekistonda uzoq yillar yashab, mamlakatimizning boy me’moriy va tarixiy merosi, diqqatga sazovor joylari, shuningdek, yurtimizning beqiyos manzaralari va tabiati bilan tanishish imkoniyatiga ega bo’lgani haqida to’lqinlanib gapirdi. “O’zbekistonning tarixiy shaharlariga borgan har bir odam o’zbek me’morchiligining o’ziga xosligi va mukammalligidan hayratga tushishi shubhasiz”, deya qayd etdi u.

Ko’rgazma homiysi L.Skurli xonim O’zbekiston o’rta asrlar Sharqining barcha nafisligi va muhtasham me’morchilik san’atining ko’plab namunalari va o’ziga xosligini saqlab qolgani hamda namoyish etayotgani bilan boshqa davlatlarga qaraganda alohida e’tiborni tortishini ta’kidladi.

— Tinchlik va osoyishtalik hukmron bo’lgan va bir vaqtlar Buyuk Ipak yo’li o’tgan ushbu barakatli zaminda juda ko’plab madaniy-tarixiy obidalar saqlanib qolgan. O’zbek xalqining bu boy merosi avaylab asrab saqlanmoqda va avloddan avlodga o’tib kelmoqda, - dedi L.Skurli xonim.

“Jahon” AA, Afina