Гюнтарам Кайзер: Ўзбекистонда коронавирус тарқалишининг олдини олиш учун қатъий чоралар кўрилмоқда

БЕРЛИН, 7 апрель. /"Дунё" АА/. Германиядаги "Public Diplomacy Initiativkreis e.V." ташкилоти раиси, "Keiser communication GmbH" компанияси ижрочи директори Гуюнтарам Кайзер "Дунё" АА мухбирига берган интервьюсида Ўзбекистонда коронавирус инфекцияси тарқалишининг олдини олиш бўйича кўрилаётган чора-тадбирлар аҳамияти ва самарадорлиги юзасидан ўз фикрлари билан ўртоқлашди.

Коронавирус пандемияси биз яшаб турган дунё мўртлигини ва бир-биримизга боғлиқ эканимизни кўрсатди. Германиядаги барча инсонлар сингари мен ҳам коронавируснинг тез тарқалиши ва у олиб келиши мумкин бўлган оқибатлардан ташвишдаман. АҚШ, Хитой, Италия ва Испания давлатлари халқларига эса чуқур ҳамдардлик билдираман. Ушбу мамлакатларда коронавирус тарқалиши оқибатида кўплаб одамлар ҳалок бўлмоқда.

Германияда касаллик тез тарқалишига қарамай, ўлим даражаси нисбатан пастлигича қолмоқда. Аммо, унутмаслик керакки мамлакатимизда кексалар ҳимояга муҳтож, улар орасида ўлим даражаси юқорилигича қолмоқда.

Германия Федерал ҳукумати ва маҳаллий ҳокимият органлари коронавирус тарқалишини камайтириш учун зарур чоралар кўрилмоқда. Ижтимоий алоқани камайтириш ва саёҳатларни тўхтатиш учун чекловлар жорий этилган. Кўрилаётган чоралар ва аҳолининг қўллаб-қувватлаши туфайли ушбу муаммонинг босқичма-босқич бартараф этилишига умид қиламиз.

Ўзбекистонда ҳам коронавирус кенг тарқалишининг олдини олишга ёрдам берадиган самарали профилактик чоралар кўрилаётганидан хабардорман. Ўзбекистондаги сўнгги янгиликлар мамлакатда дунёнинг бошқа жойларига нисбатан касалланиш даражаси анча пастлигини кўрсатмоқда.

Шу билан бирга, Ўзбекистон ҳам бошқа давлатлар каби коронавирус туфайли қийинчиликларга дуч келмоқда. Касаллик тарқалган мамлакатлардан 12 мингдан ортиқ Ўзбекистон фуқароси қайтарилди. Умуман олганда, Ўзбекистонда қарийб 100 минг одам карантинга олинган, бу соғлиқни сақлаш тизими учун катта юк.

Аммо, кўриб турганимиздек, давлат раҳбар томонидан кўрилаётган шошилинч чоралар туфайли Ўзбекистондаги вазият назорат остида. Ушбу саъй-ҳаракатлар қатъий ва ўз вақтида амалга оширилган бўлиб, катта фалокатни енгиб ўтишга ёрдам берди.

Шунингдек, республикада тезкор суръатда ўн минглаб одамларни қабул қила оладиган карантин зоналари ва касалхоналар барпо этилмоқда. Тиббий муассасалар зарур тест тизимлари ва ҳимоя воситалари билан таъминланган, бу борадаги ишлар изчил давом эттириляпти.

Президент Шавкат Мирзиёев ташаббуси билан коронавирус пандемиясининг мамлакат иқтисодиётига таъсирини юмшатиш бўйича дастур қабул қилинди. Ушбу қийин даврда тадбиркорларга, шу жумладан туризм ва меҳмонхона бизнеси билан шуғулланувчиларга алоҳида кўмак кўрсатилмоқда. Уларга солиқ имтиёзлари ва давлат бюджетидан субсидиялар бериляпти. Шу мақсадда мамлакатда тадбиркорликни ривожлантиришни қўллаб-қувватловчи махсус жамғарма ташкил этилди.

Тажрибалар шуни кўрсатмоқдаки, аҳоли бу каби оғир вақтларда ҳукумат томонидан қабул қилинган қарор ва кўрсатмаларга қатъий риоя қилиши керак. Зеро, жиддий чоралар ушбу вазиятдан чиқишнинг ягона йўлидир.

Ишончим комилки, Ўзбекистон халқи айни пайтдаги инсон соғлиғи билан боғлиқ тўсиқларни енгиб, мамлакатнинг гуллаб-яшнаши ва барқарорлиги йўлидаги ташаббусларни давом эттиради.