INSON UMRIDA HECH BO’LMASA BIR BOR KO’RISHI LOZIM BO’LGAN SHAHAR

Xabar qilinganidek, shu yilning 11-12-mart kunlari O’zbekiston Prezidenti Shavkat Mirziyoyev Buxoro viloyatida bo’ldi. Safar doirasida davlat rahbari mamlakatimizning mazkur voha turizm salohiyatini yanada oshirish dasturi taqdimotida ishtirok etdi.

Ushbu hujjat dunyoning ko’plab, xususan, malayziyalik soha vakillarida ham katta qiziqish uyg’otmoqda. Dastur bilan tanishar ekan, Malayziyaning Terengganu shtati turizm masalalari departamenti vakolatli xodimi Muhammad Raja Abdulatif bu haqdagi o’z mulohazalarini “News of Asia” internet nashrida “Buxoroda turizmni rivojlanishga uchun keng qamrovli dasturilamal” sarlavhali maqolasida bayon etdi.

Unda dastur doirasida turizmning turli yo’nalishlari bo’yicha ko’plab loyihalar amalga oshirilishi ta’kidlanadi. Muallifning fikriga ko’ra, Buxoro viloyatida sayyohlikning diniy-madaniy, tibbiyot, ekologik, qishloq xo’jaligi, sanoat va ishbilarmonlik turizmi va boshqa turlarini rivojlantirish mumkin bo’ladi. Shuningdek, malayziyalik mutaxassis o’zining boy pazandachilik an’analariga ega bo’lgan Buxoro viloyatida gastronomik turizm ham muhim o’rin tutadi, deb hisoblaydi.

“Dasturning tarkibiy qismi BMTning Butunjahon turizm tashkiloti va sohaga ixtisoslashgan boshqa institutlar bilan hamkorlikni kengaytirishdan iborat, - deb yozadi M.R.Abdulatif. - Puxta o’ylangan rejalarni amalga oshirish Buxoro nomli turizm yo’nalishining tez sur’atlarda ommalashuviga, yo’l-transport va muhandislik-kommunikatsiya infratuzilmasining takomillashishiga xizmat qiladi”.

Shuningdek, muallif O’zbekiston rahbarining shahardagi muqaddas qadamjolar atrofidan o’tadigan kichik halqa yo’li bunyod etish va 1,2 gektar maydonni o’z ichiga oladigan Buxoro tarixi davlat muzeyini qurish haqidagi tashabbuslariga yuqori baho beradi. “Muzey ishga tushirilganidan so’ng shaharning boshqa maskanlarida saqlanayotgan noyob eksponatlar u yerga ko’chiriladi, - deyiladi maqolada. - Qabul qilingan chora-tadbirlar natijasida viloyatga kelishni istovchi sayyohlar soni yanada ortadi”.

Malayziyalik ekspert Buxoroning tarixi va zamonaviy hayoti haqida ham hikoya qiladi. Jumladan, shaharga “qadimiy va ayni paytda hamisha navqiron” deya ta’rif berar ekan, muallif bu yerda 660 ta bebaho qadimiy ziyoratgohlar va madaniy meros ob’yektlari joylashganini aytadi.

“Buxoroda o’zbek xalqining ko’p asrlik an’analari va qadriyatlari o’z aksini topgan, - deb yozadi maqola xulosasida M.R.Abdulatif. - U hamisha ohanrabo kabi butun dunyodan mehmonlarni o’ziga jalb etib turadi. Viloyatning turizm salohiyatini yanada oshirish dasturi sayyohlar oqimini bir necha barobar oshishiga ko’maklashadi. Zotan, Buxoro - har qanday inson umrida hech bo’lmasa bir bor ko’rishi lozim bo’lgan shahardir”.

“Jahon” AA, Kuala-Lumpur