Iqtisodiy taraqqiyotimizning muhim omili

O‘zbekiston Respublikasi Savdo-sanoat palatasida «Tadbirkorlikni rivojlantirish – O‘zbekiston iqtisodiyotini yuksaltirishning muhim omili» mavzusida brifing bo‘lib o‘tdi.

Unda AQSh, Xitoy, Ispaniya, Italiya, Latviya va Rossiyadan mamlakatimizga Prezident sayloviga tayyorgarlik ko‘rish va uni o‘tkazish jarayonini kuzatish uchun kelgan ekspertlar ishtirok etdi.

Brifingda tadbirkorlikni qo‘llab-quvvatlash va rag‘batlantirish mamlakatimizda davlat siyosatining ustuvor yo‘nalishlaridan biri ekani ta’kidlandi.

Chet ellik mehmonlar O‘zbekistonda xususiy tadbirkorlikni yanada rivojlantirish va biznes muhitini takomillashtirish, tadbirkorlarimiz xorijiy sheriklar bilan ishbilarmonlik aloqalarini yo‘lga qo‘yishi, mamlakatimizda ishlab chiqarilgan tovar hamda xizmatlarni tashqi bozorlarga taklif etishi uchun qulay sharoitlar yaratishga qaratilgan keng ko‘lamli chora-tadbirlar bilan tanishtirildi.

Xususan, Savdo-sanoat palatasi tomonidan muntazam o‘tkazib kelinayotgan seminar, trening va konferensiyalarda tadbirkorlarga soliq va bojxona qonunchiligi, tashqi iqtisodiy faoliyatni tartibga soladigan me’yoriy-huquqiy hujjatlar mazmun-mohiyati, kredit olish tartibi tushuntirilmoqda. O‘tgan yili o‘zbekistonlik 80 tadbirkor Germaniya, Malayziya, Xitoy, Isroil, Janubiy Koreya va Italiyada kasb malakasini oshirib qaytdi.

2014-yilning 1-yanvaridan tadbirkorlik subyektlarini internet tarmog‘i orqali ro‘yxatga olish imkoniyatining yaratilgani bu jarayonni sezilarli darajada yengillashtirdi. O‘tgan yili 10 mingdan ziyod yangi tadbirkorlik subyektining onlayn-ro‘yxatdan o‘tgani ham buning yorqin tasdig‘idir.

Ayniqsa, yosh tadbirkorlarni qo‘llab-quvvatlashga alohida e’tibor berilmoqda. Bu borada o‘tkazib kelinayotgan «Mening biznes g‘oyam», «Yosh tadbirkor – yurtga madadkor», «Yosh tadbirkor – kelajakka poydevor» va boshqa tanlovlar g‘oliblariga o‘z biznes-loyihalarini amalga oshirish uchun imtiyozli kreditlar taqdim etilmoqda.

Xalqaro hamkorlik ham kengayib bormoqda. O‘tgan yili mamlakatimizda 56 qo‘shma korxona tashkil etildi.

– O‘zbekistonda tadbirkorlikni rivojlantirish borasida batafsil axborot oldik, – deydi Misr Arab Respublikasi Savdo-sanoat palatasi raisining o‘rinbosari Hamdi Abu al-Aneyn. – O‘zbekistonda fermerlik qanday rivojlanayotgani bilan tanishib, qator korxonalarda bo‘ldik. Ayniqsa, qishloq xo‘jaligi mahsulotlari ishlab chiqarish va ularni qayta ishlash, namunali loyihalar asosida zamonaviy uy-joylar qurish borasidagi yutuqlar katta taassurot qoldirdi. Bularning barchasi mamlakatingizda tadbirkorlikni qo‘llab-quvvatlash bo‘yicha samarali davlat siyosati amalga oshirilayotganidan dalolatdir.

www.uza.uz