ISHONCHLI VAKIL XATIRCHI TUMANI SAYLOVCHILARI BILAN UCHRASHDI

O‘zbekiston Xalq demokratik partiyasidan O‘zbekiston Respublikasi Prezidentligiga nomzod Xatamjon Ketmonovning ishonchli vakili A.Ahmedov Navoiy viloyati Xatirchi tumani saylovchilari bilan uchrashdi.

Ishonchli vakil saylovchilarni Xatamjon Ketmonovning tarjimai holi va saylovoldi dasturi bilan tanishtirdi.

Vakil Prezidentlikka nomzodning dasturida belgilangan muhim jihatlarni qayd etar ekan, qishloq vrachlik punktlari tarmog‘ini kengaytirish, imtiyozli va bepul malakali tibbiy-sanitariya xizmati ko‘rsatilishini tartibga soluvchi qonun va hujjatlar ijrosi ustidan tizimli nazoratni kuchaytirish, farmavsevtika korxonalari va dorixona muassasalari faoliyati hamda dori-darmon vositalari narxi ustidan davlat va jamoatchilik nazoratini mustahkamlash, dori vositalari reklamasini cheklash kabi muhim vazifalarga alohida e’tibor qaratilganini ta’kidladi.

Nomzod dasturida istiqbolli loyihalarni rivojlantirish bo‘yicha investitsiya dasturlari ishlab chiqishga malakali o‘rta maxsus va oliy ma’lumotli mutaxassislarni jalb etish hamda hududiy bandlik dasturlari bilan o‘zaro bog‘liqlikni ta’minlash, ishchi kuchi chetga chiqib ketishining oldini olish, buning uchun aholi bandligini ta’minlashning mutlaqo yangi va zamonaviy usullarini joriy qilish, ish o‘rinlari tashkil etish dasturining so‘zsiz bajarilishi ustidan parlament nazoratini kuchaytirish kabi ustuvor vazifalar ilgari surilgan.

Uchrashuvda xalq deputatlari Xatirchi tumani Kengashidagi partiya guruhi rahbari R.Boymurodov, tumandagi 88-davlat ixtisoslashtirilgan umumta’lim maktabi direktori M.Saidahmedova, “Sog‘lom avlod uchun” xalqaro xayriya fondi tuman bo‘limi direktori Sh.Jo‘rayeva va boshqalar nomzodning dasturida belgilangan ustuvor vazifalar xususida fikr bildirdi.

Nomzodning ishonchli vakili saylovchilarning savollariga atroflicha javob qaytardi.

O’zA