JANUBIY KOREYADAN TABRIK

Koreya Respublikasi Milliy Assambleyasining Xalqaro munosabatlar va birlashmalar qo’mitasi raisi, Koreya - O’zbekiston parlamentlararo do’stlik guruhining raisi Na Kyung Von O’zbekiston Respublikasi davlat mustaqilligining 24 yilligi munosabati bilan o’z tabrigini yo’lladi. Quyida mazkur tabrik matni e’tiboringizga havola etiladi:

— 1992 yili O’zbekiston Respublikasi va Koreya Respublikasi o’rtasida diplomatiya munosabatlari o’rnatilganidan buyon Koreya siyosiy, iqtisodiy va madaniy sohalardagi yaqin hamkorlik aloqalarini rivojlantirib kelmoqda.

2006 yili o’zaro munosabatlarimiz sifat jihatdan yangi, “strategik sheriklik” bosqichiga ko’tarildi. Ikki mamlakatning birgalikdagi sa’y-harakatlari tufayli sheriklik aloqalari izchillik bilan mustahkamlanmoqda.

Davlatlarimiz barcha yo’nalishlardagi aloqalarni yanada rivojlantirish uchun ulkan salohiyatlarga egadir. Sidqidildan ishonamanki, Janubiy Koreya va O’zbekiston o’rtasidagi mustahkam do’stlik ikki mamlakat xalqlari farovonligi yo’lida bundan keyin ham rivojib boraveradi.

O’zbekistonliklarni ushbu qutlug’ sana munosabati bilan samimiy muborakbod etaman, tinchlik-xotirjamlik farovonlik va yangidan-yangi muvaffaqiyatlar tilayman.

“Jahon” AA, Seul