Joriy yilda Toshkent viloyatida 62 ta ko‘p qavatli uy quriladi

Prezident Shavkat Mirziyoyev Bekobod shahridagi «Mustaqillikning 27 yilligi» massivida barpo etilayotgan ko‘p qavatli uylarni ko‘zdan kechirdi.

Bekobodda 90 mingdan ziyod aholi yashaydi. Aholining uy-joyga bo‘lgan ehtiyojini ta’minlash maqsadida shaharda beshta yetti qavatli uy qurib bitkazilmoqda. Davlatimiz rahbari taklifi bilan "Mustaqillikning 27 yilligi massivi" deb nomlangan mazkur yangi mavzeda odamlar uchun barcha sharoitlar yaratilmoqda. Uylarni qurishda eng zamonaviy materiallardan foydalanilmoqda, xonadonlarga energiyatejamkor isitish qozonlari o‘rnatilmoqda.

Prezidentimiz shu yerda shahar aholisi bilan muloqot qildi. O‘zbekiston metallurgiya kombinatida va Bekobod shahrida yangi korxonalar ishga tushirilib, ko‘plab ish o‘rinlari yaratilgani, qurilayotgan uy-joylar va ijtimoiy ob’ektlar odamlar turmush darajasini oshirgani ta’kidlandi. Davlatimiz rahbari joriy yilda Olmaliq, Yangiyo‘l, Bekobod, Nurafshon shaharlarida 2604 xonadondan iborat 62 ko‘p qavatli uy foydalanishga topshirilishini ma’lum qildi.

Shu yerda Ohangaron shahridagi Amir Temur ko‘chasini rekonstruksiya qilish, Yuqorichirchiq, O‘rtachirchiq va Ohangaron tumanlarida namunaviy uylar qurish, viloyatda ichimlik suv tizimini yaxshilashga qaratilgan loyihalar taqdimotlari o‘tkazildi.

UzA