“KAMALAK” YULDUZLARI” ISTE’DODLARNI CHORLAYDI

Birinchi Prezidentimiz Islom Karimov qarori bilan tasdiqlangan “Sog‘lom ona va bola yili” Davlat dasturida navqiron avlod ijodiy salohiyatini yuksaltirish, ularning iste’dodi kamol topishiga har jihatdan ko‘maklashish muhim vazifa sifatida belgilangan.

“Kamolot” yoshlar ijtimoiy harakati, Yoshlar tashabbuslari markazi va O‘zbekiston Respublikasi Xalq ta’limi vazirligi hamkorligida har yili o‘tkaziladigan “Kamalak” yulduzlari” bolalar ijodiyoti festivali ana shu ezgu maqsadlarga xizmat qilayotir. Hozirgi kunda yurtimiz o‘quvchi-yoshlaridan mazkur ijodiy loyihada ishtirok etish uchun arizalar qabul qilish davom etmoqda.

Festival iqtidorli bolalarni aniqlash, ularni har tomonlama qo‘llab-quvvatlash, iste’dod va mahoratlarini namoyon etishi uchun imkoniyat yaratib berish, yosh avlodning ma’naviy olamini boyitishdek maqsadlarni ko‘zlagan. O‘g‘il-qizlarning madaniy saviyasini yuksaltirish, san’at va go‘zallikka bo‘lgan qiziqishini yanada kuchaytirish, milliy san’at an’analari va yo‘nalishlarini asrash, rivojlantirish hamda davom ettirishda ushbu loyihaning ahamiyati kattadir. Unda 6 yoshdan 14 yoshgacha bo‘lgan iqtidorli bolalar ishtirok etishi mumkin.

Festival uchun o‘tkaziladigan tanlov fortepiano, torli-kamonli, damli va zarbli cholg‘u asboblari, milliy va akademik ijro, estrada, folklor va xor guruhlari, kamonli, damli va zarbli xalq cholg‘u asboblari, milliy, ball va zamonaviy raqslar, tasviriy va amaliy san’at, adabiyot kabi yo‘nalishlarda o‘quvchilarning ijodiy mahoratini aniqlash imkonini beradi.

Arizalar shu yilning 15-oktabriga qadar «Kamolot» yoshlar ijtimoiy harakati, uning tuman va shahar bo‘limlarida qabul qilinmoqda. Ishtirokchilarni tajribali va yuqori malakali mutaxassislar, ustoz san’atkorlar, rassom hamda hunarmandlar, xoreograflar, shoir va yozuvchilardan iborat hakamlar hay’ati baholab boradi. Loyihaning barcha bosqichlari keng jamoatchilik uchun ochiq bo‘lib, saralash jarayonlarining borishi, yo‘nalishlar bo‘yicha ishtirokchilarning ijodiy dasturi tomoshabin va tinglovchilar tomonidan kuzatib borilishi mumkin.

Har bir bosqichda yo‘nalishlar bo‘yicha eng yaxshi natijalarga erishgan ishtirokchilar sertifikatlar, diplomlar va esdalik sovg‘alari bilan rag‘batlantiriladi. “Kamalak” yulduzlari” festivali g‘oliblarining ijodiy faoliyati qo‘llab-quvvatlanadi va rivojlantirib boriladi, eng yaxshi ijodiy ishlar namunalari ko‘rgazmalari tashkil etiladi.

Festivalning final bosqichi 2016-yilning dekabr oyida bo‘lib o‘tadi.

O’zA