KIRIB KELAYOTGAN BAYRAM RUHIDA

Poytaxtimizning G’afur G’ulom nomidagi madaniyat va istirohat bog’ida “Betakrorimsan, yagonasan, ona Vatanim - O’zbekistonim!” shiori ostida «O’zbekiston - umumiy uyimiz» deb nomlangan madaniy-ma’rifiy tadbir bo’lib o’tdi, deb xabar beradi shahar hokimligining matbuot xizmati.

Eng ulug’, eng aziz bayram - Vatanimiz mustaqilligining 24 yilligiga bag’ishlangan mazkur tadbir Respublika Baynalmilal madaniyat markazi, «Tasviriy oyina» ijodiy uyushmasi va qator tashkilotlar bilan o’zaro hamkorlikda uyushtirildi. Unda yurtimizda faoliyat ko’rsatayotgan milliy madaniyat markazlari, davlat va jamoat tashkilotlari vakillari, yozuvchi va shoirlar, badiiy jamoalar, mahalla faollari, yoshlar ishtirok etdi.

Bosh qomusimizda mamlakatimizda barcha fuqarolar jinsi, irqi, millati, tili, e’tiqodi, shaxsiy va ijtimoiy mavqeidan qat’iy nazar, bir xil huquq va erkinlikka ega ekani belgilangan. Bu turli millat va elat vakillarining shu yurtning teng huquqli farzandi sifatida yashab, mehnat qilishida, xalqimiz farovonligi va Vatanimizning taraqqiyotini ta’minlashga hissa qo’shishida muhim omil bo’layotir.

Tadbir doirasida milliy madaniyat markazlari tomonidan tasviriy va amaliy san’at asarlari, milliy taomlar va liboslar ko’rgazmasi tashkil etildi. Turli xalqlarga xos urf-odatlar namoyishi, milliy madaniyat markazlari qoshidagi folklor jamoalarning kuy-qo’shiqlari barcha ishtirokchilarga bayramona kayfiyat baxsh etdi.

“Jahon” AA