KUCHLI IJTIMOIY SIYOSAT SAMARALARI

Milliy matbuot markazida Vatanimiz mustaqilligining 25-yilligiga bag‘ishlab o‘tkazilgan tadbirda O‘zbekiston Xalq demokratik partiyasi tomonidan tashkil etilgan “Kuchli ijtimoiy himoya – asosiy maqsadimiz!” aksiyasi yakunlari haqida ma’lumot berildi.

Partiya markaziy kengashi raisi o‘rinbosari U.Vafoyev va boshqalar mamlakatimizda izchil yo‘lga qo‘yilgan kuchli ijtimoiy siyosat aholining barcha qatlamini qamrab olganini alohida ta’kidladi. Uni hayotga tatbiq etishda nafaqat davlat, balki jamoat tashkilotlari, partiyalar ham faol ishtirok etmoqda.

“Kuchli ijtimoiy himoya – asosiy maqsadimiz!” aksiyasi doirasida hamkor tashkilotlar vakillaridan iborat guruhlar tashkil etildi. Kam ta’minlangan oilalar aniqlanib, moddiy va ma’naviy ko‘mak ko‘rsatildi. Ta’mirtalab uy-joylar aniqlanib, ularning egalariga qurilish materiallari yetkazib berildi. Bu jarayonda “Mahalla” xayriya jamoat fondi, “Nuroniy” jamg‘armasi va Nogironlar jamiyati kabi tashkilotlar bilan hamkorlik yo‘lga qo‘yildi.

Aksiya doirasida olti mingga yaqin kam ta’minlangan, boquvchisini yo‘qotgan hamda nogironlar istiqomat qiladigan xonadonlar holidan xabar olindi.

Tadbirda jurnalistlarni qiziqtirgan savollarga javob qaytarildi.

O’zA