MA’LUMOTLAR OCHIQLIGI TA’MINLANMOQDA

Poytaxtimizda O‘zbekiston Respublikasi Vazirlar Mahkamasining shu yil 7-avgustdagi «Ochiq ma’lumotlar taqdim etilishi hisobga olingan holda Internet tarmog‘ida O‘zbekiston Respublikasining Hukumat portalini yanada takomillashtirish chora-tadbirlari to‘g‘risida»gi qarori mazmun-mohiyatiga bag‘ishlangan matbuot anjumani bo‘lib o‘tdi.

Axborot texnologiyalari va kommunikatsiyalarini rivojlantirish vazirligi tomonidan tashkil etilgan tadbirda Prezidentimiz Islom Karimov rahnamoligida milliy axborot-kommunikatsiya tizimini rivojlantirish yuzasidan amalga oshirilayotgan islohotlar davlat va fuqarolar o‘rtasidagi aloqalarning yanada mustahkamlanishi, boshqaruv samaradorligini oshirishda muhim ahamiyat kasb etayotgani ta’kidlandi.

Joriy yilning mart oyida O‘zbekiston Respublikasining «Davlat hokimiyati va boshqaruvi organlari faoliyatining ochiqligi to‘g‘risida»gi qonunida belgilab berilgan maqsad-vazifalarni amalga oshirish, mahalliy veb-resurslar, raqobatbardosh dasturiy mahsulotlar va xizmatlar bozorini yanada rivojlantirish maqsadida sinov tartibida ishga tushirilgan Ochiq ma’lumotlar portalida davlat organlari faoliyatiga taalluqli ma’lumotlar jismoniy va yuridik shaxslarga erkin foydalanish uchun bepul taqdim etilmoqda.

Hozirgi paytgacha Ochiq ma’lumotlar portalida 50 davlat organining 550 turdagi ma’lumotlari e’lon qilingan. O‘zbekiston Respublikasi Xalq ta’limi, Tashqi ishlar, Sog‘liqni saqlash vazirliklari, Markaziy bank, Davlat soliq qo‘mitasi, Xususiylashtirish, monopoliyadan chiqarish va raqobatni rivojlantirish davlat qo‘mitasi va boshqa davlat organlari tomonidan taqdim etilgan ma’lumotlar 100 ming martadan ziyod yuklab olingan.

– Qaror asosida tasdiqlangan nizomda mazkur elektron resursni rivojlantirish, foydalanuvchilar uchun zarur ma’lumotlarni taqdim qilish mexanizmini takomillashtirish, portal operatori va ma’lumotlarni taqdim qiluvchi mas’ullar, foydalanuvchilar bilan o‘zaro aloqalarni tartibga solish chora-tadbirlari belgilangan, – deydi «Elektron hukumat» tizimini rivojlantirish markazi direktori o‘rinbosari Elyor Rahmonov. – Bu fuqarolarning axborot olish va uni tarqatish, axborotdan foydalanish kabi muhim konstitutsiyaviy huquqlarining yanada keng ta’minlanishi, “elektron hukumat” tizimining muvaffaqiyatli tatbiq etilishiga xizmat qiladi.

Ochiq ma’lumotlar portalini zarur axborot bilan ta’minlash va yangilab borishda davlat organlari rahbarlari bevosita javobgar hisoblanadi. Davlat va xo‘jalik boshqaruvi organlari, mahalliy hokimliklar veb-saytlarida ham “Ochiq ma’lumotlar” bo‘limi tashkil qilinib, ma’lumotlar bilan muntazam to‘ldirib boriladi.

2013-2020-yillarda O‘zbekiston Respublikasi Milliy axborot-kommunikatsiya tizimini rivojlantirish kompleks dasturi amalga oshirilishini muvofiqlashtirish respublika komissiyasi tomonidan davlat va xo‘jalik boshqaruvi organlari, mahalliy davlat hokimiyati organlarining saytlarida va Ochiq ma’lumotlar portalida e’lon qilinishi lozim bo‘lgan ma’lumotlar to‘plamlari ro‘yxati tasdiqlanib, hukumat portalida e’lon qilinadi.

Tadbirda jurnalistlarning savollariga mutaxassislar javob qaytardi.

WWW.UZA.UZ