“Mahalla – fuqarolar o’zini o’zi boshqarishning noyob instituti”

Toshkentda O’zbekiston “Mahalla” xayriya jamoat fondi respublika boshqaruvi tomonidan “Mahalla – fuqarolar o’zini o’zi boshqarishning noyob instituti” mavzuiga bag’ishlangan brifing tashkil etildi, deya xabar beradi Uzbekistan Today axborot agentligi.

Ayni paytda, mahallalarda yarashtirish, ma’rifat va ma’naviyat, bo’yicha komissiya, ijtimoiy qo’llab-quvvatlash, xotin-qizlar bilan ishlash, voyaga yetmaganlar, yoshlar va sport masalalari, tadbirkorlik faoliyati va oilaviy biznesni rivojlantirish, ekologiya va tabiatni muhofaza qilish, obodonlashtirish va ko’kalamzorlashtirish, jamoatchilik nazorati va iste’molchilarning huquqlarini himoya qilish bo’yicha 8 ta jamoatchilik komissiyalarining samarali faoliyat ko’rsatmoqda, ular ishiga keng jamoatchilik jalb etilmoqda.

Tadbirda fuqarolik jamiyatini rivojlantirishning muhim bo’g’ini sifatida e’tirof etilayotgan mahalla faoliyati xorijiy davlatlarning olim va ekspertlari tomonidan ham katta qiziqish bilan o’rganayotgani qayd etildi.

Shu bilan birga, brifingda 1992-yilda tashkil etilgan “Mahalla” xayriya jamoat fondining mahallalarda milliy qadriyatlarni e’zozlash va targ’ib etish, madaniy-ma’rifiy ishlarni keng yo’lga qo’yish, shuningdek, aholini ijtimoiy-iqtisodiy jihatdan mustahkamlash, ijtimoiy himoyaga muhtoj qatlamlarni qo’llab-quvvatlash, fuqarolar yig’inlariga uslubiy ko’maklashish borasida muhim o’ringa ega ekanligi ta’kidlandi.

Birgina 2014-yil mobaynida Fond tuzilmalari tomonidan fuqarolarning ma’naviy-axloqiy va ijtimoiy-siyosiy faolligini oshirish hamda yoshlarni milliy qadriyatlar ruhida tarbiyalash bo’yicha mahallalarda 280 mingdan ortiq tadbirlar o’tkazildi. Shuningdek, kam ta’minlangan oilalar, nogironlar, yetimlar va yakka-yolg’iz keksalarni qo’llab-quvvatlash uchun ham Fond hisobidan 7 milliard so’m mablag’ sarflandi.

“Jahon” AA