MAHSULOTLARIMIZ XALQARO STANDARTLARGA MOS

Milliy matbuot markazida «O‘zstandart» agentligi tomonidan «Mamlakatimizda xalqaro standartlarni joriy etishning dolzarb masalalari» mavzuida matbuot anjumani bo‘lib o‘tdi.

«O‘zstandart» agentligi bosh direktori A.Hayitov va boshqalar mamlakatimizda ishlab chiqarishni modernizatsiya qilish, xalqaro sifat standartlari asosida faoliyat ko‘rsatishga qaratilayotgan e’tibor tufayli mahsulotlarimiz nafaqat ichki, balki tashqi bozorda ham mustahkam o‘rin egallayotganini ta’kidladi.

Birinchi Prezidentimizning 2012-yil 26-martdagi “Eksport qiluvchi korxonalarni rag‘batlantirishni kuchaytirish va raqobatbardosh mahsulotlarni eksportga yetkazib berishni kengaytirish borasida qo‘shimcha chora-tadbirlar to‘g‘risida”gi qarori bu borada muhim dasturilamal bo‘layotir.

«O‘zstandart» agentligi tomonidan mamlakatimizda ishlab chiqarilayotgan mahsulotlar sifatini yanada yaxshilash, muvofiqlikni baholash natijalari tan olinishini ta’minlash maqsadida 2020-yilgacha sifat milliy infratuzilmasini rivojlantirish dasturini amalga oshirish ishlari olib borilmoqda.

– Dastur ijrosi doirasida sinov va o‘lchov vositalarini modernizatsiya qilish, texnik qayta jihozlash, laboratoriyalarni xalqaro darajada akkreditatsiyadan o‘tkazish, xalqaro standartlarni va sifatni boshqarish tizimlarini joriy etishga alohida e’tibor qaratilmoqda, – deydi “O‘zstandart” agentligi boshqarma boshlig‘i Odiljon Tohirov. – 2016-yilda sinov va o‘lchov laboratoriyalarini modernizatsiya qilish va qayta jihozlashga 4849,2 million so‘mlik mablag‘ sarflanib, 172 zamonaviy va yuqori aniqlikdagi uskunalar xarid qilindi.

Agentlikning oziq-ovqat, yengil sanoat, elektrotexnika va qurilish yo‘nalishlari bo‘yicha sinov laboratoriyalari xalqaro akkreditatsiyadan o‘tkazilgan. Matbuot anjumanida agentlik tomonidan 2017-yilda tizimdagi yana 4 sinov laboratoriyasini xalqaro akkreditatsiyadan o‘tkazish rejalashtirilganligi qayd etildi. Jurnalistlarni qiziqtirgan savollarga mutaxassislar javob qaytardi.

O’zA