MALAYZIAYDA O’ZBEKISTON MUSTAQILLIGI KUNI NISHONLANDI

Malayziyaning Kuala-Lumpur shahrida mamlakatimiz mustaqilligning 24-yilligi munosabati bilan tantanali qabul marosimi bo’lib o’tdi.

O’zbekistonning Malayziyadagi elchixonasi tomonidan tashkil qilingan mazkur tadbirda mazkur mamlakat siyosiy-jamoatchilik, ishbilarmon va ilmiy doiralari vakillari, vazirlik va idoralari xodmlari, shuningdek, OAV ishtirok etdilar.

Mezbon mamlakat hukumati nomidan asosiy mehmon sifatida Malayziya Ichki ishlar vaziri o’rinbosari Datuk Nur Jazlan Muhammad so’zga chiqdi va Malayziya O’zbekiston bilan hamkorlik aloqalarini kengaytirishga asosiy e’tibor qaratayotganini ta’kidladi. Ikki mamlakat BMT, IHT va boshqa xalqaro tashkilotlar doirasida bir-birlarini o’zaro samarali qo’llab-quvvatlab keladi.

Tadbir qatnashchilari o’zbek xalqini bayram bilan samimiy tabriklagani holda yurtimizda ijtimoiy-siyosiy, iqtisodiy, madaniy-gumanitar sohalarda amalga oshirilayotgan islohotlar samaradorligini e’tirof etdilar.

Xususan, Linkoln universiteti kolleji prorektori Datuk Bibi Florina Abdulloh quyidagilarini aytib o’tdi:

— Mamlakatingizning bugungi taraqqiyoti kishini hayratda qoldiradi. Prezident Islom Karimov rahnamoligida respublikada ko’p sohalarda ulkan muvafaqqiyatlarga erishildi, jumladan, fan va ta’lim sohasida ham.

O’zbekiston qo’lga kiritilgan natijalar bilan cheklanib qolmasdan o’z yo’lida ishonch bilan davom etayotgani meni lol qoldirdi. Fursatdan foydalanib, o’zbek xalqini qutlug’ bayram - Mustaqillikning 24-yilligi bilan samimiy muborakbod etmoqchiman va yurtingizga tinchlik va farovonlik tilayman.

Maks Sey, Osiyo strategiya va liderlik instituti vitse-prezidenti:

— Qisqa davr mobaynida mamalakatingiz turli jabhalarda sezilarli natijalarga erishdi. Yurtingizga qilgan safarim chog’ida ta’lim sohasida, xususan, akademik litsey, kasb-hunar kolleji va oliy o’quv yurtlari faoliyatida amalga oshirilayotgan islohotlar bilan yaqindan tanishishga muvaffaq bo’ldim. O’zbekistonda tinchliksevar yosh barkamol avlodni tarbiyalashga qaratilayotgan e’tibor yuksak e’tirofga loyiq.

Nor Farida Abdul Rashid, “Bernama” milliy axborot agentligi jurnalisti:

— O’zbekistonga uch marotaba tashrif buyurish sharafiga muyassar bo’ldim. Mamlakatingiz haqida menda juda yorqin va iliq taassurotlar qolgan. O’zbekiston - yuksak salohiyatli navqiron mamlakat va buni ta’kidlash meni behad mamnun etadi.

— Ulug’ ayyom – Mustaqillik bayrami bilan tabriklashga ijozat bergaysiz. Yurtingizga taraqqiyot va farovonlik tilayman.

“Jahon” AA, Kuala-Lumpur