MAMLAKATIMIZDAGI BARCHA O‘QUV MUASSASALARIDA “DIQQAT, BOLALAR!” TADBIRLARI O‘TKAZILMOQDA

Mamlakatimizdagi barcha o‘quv muassasalarida O‘zbekiston Respublikasi Ichki ishlar vazirligi tashabbusi bilan o‘quv yilining birinchi o‘n kunligida yo‘l harakati xavfsizligini ta’minlash maqsadida “Diqqat, bolalar!” tadbirlari o‘tkazilmoqda.

Har yil an’anaviy tarzda o‘tkazilayotgan profilaktika tadbirlarida o‘quvchi-yoshlarga yo‘l harakati qoidalari, haydovchi va piyodalarning majburiyatlari, xavfsizlik shartlari batafsil tushuntirilmoqda. Yo‘l-transport hodisalarining oqibatlari va ularning oldini olishga doir ma’lumotlar berib borilmoqda.

Profilaktika tadbirlari davomida har bir o‘quv muassasasiga yo‘l harakati xavfsizligi xizmati xodimlari biriktirilib, piyodalarga, ayniqsa, bolalarga yo‘l harakati qoidalarini bilishi zarurligi uqtirilmoqda.

– Yo‘l harakati xavfsizligini ta’minlash maqsadida o‘tkazilayotgan “Diqqat, bolalar!” singari tadbirlar o‘z natijasini bermoqda, – deydi Toshkent shahar IIB bosh boshqarmasi ommaviy axborot vositalari bilan aloqa qilish bo‘linmasi boshlig‘i To‘lagan Abdullayev. – Olib borilgan targ‘ibоt tadbirlari samarasida joriy yilning o‘tgan sakkiz oyi mobaynida bolalar bilan sodir etilgan yo‘l-transport hodisalari 24 foizga kamaydi.

Poytaxtimizning Chilonzor tumanidagi 162-umumta’lim maktabida bo‘lgan tadbirda ham soha xodimlari tomonidan o‘quvchi-yoshlarga ko‘rgazmali qurollar asosida yo‘l harakati qoidalari, piyodalarning majburiyatlari haqida batafsil ma’lumotlar berildi.

– Maktabga har kuni jamoat transportida qatnayman, – deydi 8-sinf o‘quvchisi Samariddin Doniyorov. – Har birimiz yo‘l qoidalarini bilishimiz, piyodalar qanday harakatlanishi kerakligi, yo‘llarni kesib o‘tish qoidalarini mukammal o‘rganishimiz zarur. Bugungi tadbirda bu borada yanada ko‘proq ma’lumotga ega bo‘ldim.

O’zA