Minnatdorlik, to‘kinlik, hosil bayrami

Poytaxtimizdagi Koreys madaniyat va san’at saroyida “Chxusok – 2019“ an’anaviy koreys milliy festivali bo‘lib o‘tdi. Unda hamshaharlarimiz va poytaxtimiz mehmonlari, keng jamoatchilik, milliy madaniyat markazlarining vakillari ishtirok etdi.

Tadbirda O‘zbekiston koreys madaniyat markazlari uyushmasi raisi Viktor Pak, Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi raisi Rustam Qurbonov, Koreyaning mamlakatimizdagi Favqulodda va muxtor elchisi Kan Chje Kvon O‘zbekistonda turli millat va elat vakillari ahil oila farzandlaridek istiqomat qilishi uchun barcha sharoit yaratilganini ta’kidladi.

Yurtimizda turli millat vakillarining o‘ziga xos bayramlari katta tantana qilinadi. Chxusok – kuzgi shabada ma’nosini anglatadi. Tabiat saxiyligi uchun minnatdorlik va mo‘l hosil bayramida ota-onalarni yo‘qlash, to‘kin dasturxon atrofida jam bo‘lish, samimiy va dildan suhbat qurish, o‘tganlar xotirasini yodga olish yaxshi an’anaga aylangan.

Shu kuni kuzgi mayin shabada barchaga huzur bag‘ishladi. Bayram tom ma’noda ahillik, do‘stlik, shukronalik ayyomiga aylandi.

– Umrim, taqdirim, oilam, farzand va nevaralarim kelajagi Vatanim – O‘zbekiston bilan chambarchas bog‘liq, – dedi nuroniy otaxon Leonid Kim. – Shu zaminda baxtimni topdim. O‘g‘il-qizlarim o‘qidi. Oilali, kasb-korli bo‘ldi. Turmushimiz farovon, yurtimiz tinch. Bayram juda yuqori kayfiyatda o‘tgani hammaga manzur bo‘ldi.

Arina Ten Nizomiy nomidagi Toshkent davlat pedagogika universitetida tahsil oladi. U o‘zbek milliy raqslariga bolalikdan qiziqqani bois “Nafis“ raqs ansamblining faol ishtirokchisi. Arinaning raqsini ko‘rganlar uning ijrosiga maftun bo‘lishi shubhasiz.

– O‘zbek milliy raqslari juda jozibali va betakror, – dedi Arina Ten. – Turli xalqlarning milliy raqslarini o‘rganishga astoydil kirishdim. Raqs millatlarni o‘zaro yaqinlashtiradi.

Ona zaminga minnatdorlik va hosil festivalida konsert dasturi namoyish etildi. Badiiy, foto, hunarmandlikka oid ko‘rgazmalar, mahorat darslari, pazandalik yarmarkasi, milliy o‘yinlar namoyish etildi.

UzA