MUDDATIDAN OLDIN OVOZ BERISH DAVOM ETMOQDA

Toshkent viloyatida tuzilgan 878 saylov uchastkasida ham “O‘zbekiston Respublikasi Prezidenti saylovi to‘g‘risida”gi qonunning 31-moddasiga muvofiq, saylov kuni o‘z yashash joyida bo‘lmaydigan saylovchilar konstitutsiyaviy huquqidan foydalangan holda muddatidan oldin ovoz bermoqda.

Joriy yil 4-dekabr kuni bo‘lib o‘tadigan muhim siyosiy tadbirda Toshkent viloyatidan 1 million 943 ming 289 saylovchi ovoz berishi kutilmoqda.

Angren shahrida tashkil etilgan 60 saylov uchastkasida 123 ming 460 saylovchi ro‘yxatga olingan. Saylovchilarning 306 nafari siyosiy tadbirda birinchi marta qatnashadigan yoshlardir. Yoshlarning mazkur siyosiy jarayonda faol ishtirok etishini ta’minlash, ularga saylov qonunchiligining mazmun-mohiyati, muddatidan oldin ovoz berish tartib-qoidalari haqida keng ma’lumot berish maqsadida turli targ‘ibоt-tushuntirish tadbirlari o‘tkazildi.

Har bir uchastka saylov komissiyasi zamonaviy va saylovchilar kelishi uchun qulay binoda joylashishiga, barcha texnik vositalar, zarur adabiyot va qo‘llanmalar bilan ta’minlanishiga alohida e’tibor qaratildi.

Angren tibbiyot kollejida joylashgan 33-saylov uchastkasida ushbu hududda istiqomat qilayotgan uch nafar fuqaro muddatidan oldin ovoz berdi. Ular o‘zi tanlagan nomzodga ovoz berib, saylov varaqasi muhrlangan konvertni uchastka saylov komissiyasida qoldirdi.

– Kasbim taqozosiga ko‘ra 4-dekabr kuni band bo‘laman, – deydi T.Tog‘ayev. – Bunday paytda qanday yo‘l tutilishi, muddatidan oldin ovoz berish tartibi haqida targ‘ibоt tadbirlarda yetarlicha ma’lumot oldim. Shuning uchun o‘zim yashaydigan hududdagi 33-saylov uchastkasiga kelib, komissiya raisiga ariza bilan murojaat qildim. Komissiya a’zolaridan saylov varaqasini oldim va o‘zim tanlagan nomzod uchun ovoz berdim.

O’zA