MUHIM JARAYONGA PUXTA TARADDUD

Nukusda Tadbirkorlar va ishbilarmonlar harakati – O‘zbekiston liberal-demokratik partiyasi Qoraqalpog‘iston Respublikasi kengashining navbatdagi konferensiyasi bo‘lib o‘tdi.

Shu kunlarda joriy yilning 4-dekabr kuni bo‘lib o‘tadigan O‘zbekiston Respublikasi Prezidenti sayloviga qizg‘in hozirlik ko‘rilmoqda. Saylovning yuqori saviyada, demokratik tamoyillar asosida o‘tishi ko‘p jihatdan siyosiy partiyalarning faolligi, tashabbuskorligiga bog‘liq.

Tadbirkorlar va ishbilarmonlar harakati – O‘zbekiston liberal-demokratik partiyasining Qoraqalpog‘iston Respublikasi kengashi tarkibidagi 752 boshlang‘ich tashkiloti o‘z atrofiga 16 mingdan ziyod a’zoni birlashtirib, mahalliy Kengashlardagi vakillik organlari orqali davlat boshqaruvi va jamiyat hayoti hamda amalga oshirilayotgan keng ko‘lamli islohotlarda faol ishtirok etmoqda.

Partiya o‘z maqsad va vazifalarini targ‘ib qilish, uning elektorati bo‘lgan tadbirkor va ishbilarmonlar, fermerlarning manfaatlarini qo‘llab-quvvatlash, boshlang‘ich tashkilotlar faoliyatini yanada jonlantirish, a’zolar sonini ko‘paytirish, ularni partiya tomonidan o‘tkazilayotgan loyihalarga faol jalb etish borasida samarali ishlarni olib bormoqda.

Plenumda partiya Qoraqalpog‘iston Respublikasi kengashining O‘zbekiston Respublikasi Prezidenti saylovida faol ishtirokini ta’minlash, partiyaning VIII syezdiga delegatlar saylash masalalari muhokama etildi.

– Birinchi Prezidentimiz rahnamoligida amalga oshirilgan demokratik islohotlar samarasida xalqaro talablarga to‘la javob beradigan mustahkam saylov tizimi yaratildi, – deydi O‘zbekiston liberal-demokratik partiyasi Qoraqalpog‘iston Respublikasi kengashi raisi Sog‘indiq Turmanov. – Bu bo‘lajak saylovning tenglik, oshkoralik va adolat tamoyillari asosida yuksak saviyada o‘tishiga xizmat qiladi.

Anjumanda partiyaning VIII syezdiga delegatlar saylandi.

O‘zA