MUHIM SIYOSIY JARAYON TADORIGI

Tadbirkorlar va ishbilarmonlar harakati – O‘zbekiston liberal-demokratik partiyasi Andijon viloyati kengashining navbatdagi konferensiyasi bo‘lib o‘tdi.

Joriy yilning 4-dekabrida o‘tkaziladigan O‘zbekiston Respublikasi Prezidenti saylovining xalqaro demokratik tamoyillar asosida yuqori saviyada o‘tishida siyosiy partiyalarning faol ishtiroki muhim ahamiyat kasb etadi. Ayni kunlarda yurtimizdagi barcha siyosiy partiyalar tomonidan O‘zbekiston Respublikasining “Siyosiy partiyalar to‘g‘risida”gi, “O‘zbekiston Respublikasi Prezidenti saylovi to‘g‘risida”gi qonunlariga muvofiq saylovga qizg‘in tayyorgarlik ko‘rilmoqda.

Partiya markaziy kengashi mas’ul xodimlari, O‘zbekiston Respublikasi Oliy Majlisi Senati a’zolari, Qonunchilik palatasi hamda xalq deputatlari viloyat, tuman va shahar Kengashlaridagi partiya deputatlari, partiya faollari, jurnalistlar ishtirok etgan tadbirda ushbu muhim siyosiy jarayonga tayyorgarlik hamda partiyaning navbatdagi syezdiga delegatlar saylash masalalari muhokama etildi.

– Viloyatda partiyaning 588 boshlang‘ich tashkiloti samarali faoliyat ko‘rsatmoqda, – deydi Tadbirkorlar va ishbilarmonlar harakati – O‘zbekiston liberal-demokratik partiyasi Andijon viloyati kengashi raisi Zuhriddin Jumaboyev. – Ularning tarkibiga birlashgan 17 mingga yaqin partiya a’zolari mamlakatimizda amalga oshirilayotgan keng ko‘lamli islohotlar jarayonida faol ishtirok etmoqda. Ayniqsa, xalq deputatlari viloyat, tuman va shahar Kengashlaridagi deputatlarimiz partiya elektorati manfaatlarini himoya qilish, uchrab turadigan ayrim muammolarni bartaraf etish bo‘yicha aniq taklif va amaliy ishlari bilan ajralib turadi.

Tadbirda ko‘rilgan masalalar yuzasidan tegishli qarorlar qabul qilindi, partiyaning navbatdagi qurultoyiga delegatlar saylandi.

O’zA